Rogon Me Nge Yog e Yafas nib N’uw mab Felfelan’

“GUBIN e girdi’ ma baadag e yafas nib n’uw nap’an; machane dariy be’ ni baadag ni nge pilibthir.” Ireray e thin ni yima yog. Boor e girdi’ ni kar ilalgad ni ke chuchugur ni ngar talgad ko maruwel rorad e ri yad be sonnag ni nge yoor e tayim ni ba puf rogorad ma ke buchuw e maruwel nib mil fan ngorad. Machane, yad be rus ni nge aw ndakuriy ban’en ni nguur nameged ma dakuriy farad. Maku yad be rus ni ngar pared ni goo yad, ma dariy e falfalan’, ma ra war i yan gelngirad.

Ere, mang, e susun ni ngan rin’ ni nge yib e falfalan’ ko yafas? Pi fager nib fel’ nge tabinaw ni ma t’ufegey e rayog ni nge felfelan’nag e piin ni fel’ yangaren nge pilibthir. Machane ayuw ni ma pi’ be’ ngak e en ke pilibthir e gathi ireray e n’en nri baga’ fan. Tin ni ri baga’ fan e n’en ni ma rin’ be’ ni ke pilibthir ngak boch e girdi’.

Reb e study ni kan ta’ nib n’uw nap’an ni fan ko fa 423 wu’ i mabgol ni kar pilibthirgad e ke dag ni ra “nguuda pied e ayuw ngak boch e girdi’ ma ra ayuweg ni nge n’uw boch nap’an e yafas rodad.” Stephanie Brown ni ir e ga’ ko re study nem, e ke weliy ni gaar: “N’en ni nge yog ngodad ni ma pi’ e pi fager rodad e gathi ireray e n’en ni ngari fel’ rogodad riy; ya n’en ni gad ra pi’ ngorad.” Pi ayuw ney e ba muun ngay ni ngan ayuweg e girdi’ ko maruwel rorad u tabinaw, nge ngan ayuweg e bitir, nge ngan chuw’iy boch ban’en, nge ngan fekrad nga bang u karro, ara ngan motoyil ngak e piin nib t’uf e sabethin rorad.

Gonapan 2,000 e duw ni ke yan, e yog Jesus Kristus ni gaar: “Ba gel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Rogon ni nge yog e yafas ni bay e falfalan’ riy ma ba n’uw nap’an e de t’uf ni nge yoor e salpiy u bank ara falay nge boch ban’en ni ra ayuweg ni nge dab ni pilibthir nib papey. Ya n’en nra ayuwegdad riy e nguuda pared ni gad ba pasig i rin’ ban’en ma ngad pi’ed e tayim nge gelngidad ni fan ni ngad ayuweged boch e girdi’.

Machane, ka bay ban’en ni kab t’uf rodad ma ri dabkuuda pilibthirgad, ma dabki yib e m’ar ngodad, ma dabda m’ad. Goo Gil’ilungun Got e rayog ni nge chuweg urngin e pi n’en ney. U tan e re gagiyeg rok Got ney, ma m’ar ni kub muun ngay e “yam’ ni ra chuw.” (Revelation 21:3, 4; Isaiah 33:24) Tin riyul’ riy, girdi’ ni ma fol e rayog ni nguur pared nib falfalan’ ni manemus u paradis u fayleng. (Luke 23:43) Pi Mich Rok Jehovah e yad ba felfelan’ ni ngar pi’ed ngak boch e girdi’ e rogon ni ngan rin’ nib puluw ko Bible me yog e yafas nib n’uw nap’an mab felfelan’.