Gathi Goo Ba Gosgos

BA ADAG e piin ni bitir ni ngar fafelgad. Machane i yog fare ke babyor ni The Developing Child ni gaar: “Re fafel ney gathi ban’en ni m’ay fan. Ya rogon ni ra mon’og e maruwel ko man’ey e be yan u rogon e fafel ni ma tay e piin ni bitir.” Nap’an ni ba fafel e bitir ma yad be fanay e pi thamtham rorad ma yad be fil morngaagen e pi n’en u charrad ma yad be fil rogon thilrad yugu boch e girdi’.

Ra gaman aningeg ara lal e duw rok reb e bitir ma ra tabab ni nge maafthaliy e piin ni yad ba ilal u nap’an e fafel ni yad be tay. Bay biyay ni i weliy Jesus morngaagen e piin ni bitir ni yad be fafel. Boch i yad e ba adag ni ngar fafelgad ni yaan reb e “madenom ko m’agpa’” machane yugu boch e ba adag ni nge yan u yaan e “gum’eyag.” Ma bod ni ma rin’ e piin ni bitir ma yad ra tugthin ni bochan e de un yugu boch e bitir ko fafel ni yad be tay. (Matthew 11:16, 17) Fafel ni aram rogon e rayog ni nge tamilangnag boch ban’en nga laniyan’ e bitir ni be ilal iyan.

Fapi bitir u lan e re sasing ney e yad be yan u yaan be’ ni be machibnag yugu be’ ni be fil e Bible. Gathi ri yow be machib, machane u lanin’row e yow be fil e Bible. Ma n’en ni yow be rin’ e baga’ fan ya ke tay Jesus chilen ngak urngin pi gachalpen ni ngar ayuweged yugu boch e girdi’ ni ngar manged pi gachalpen Jesus ma ngar filed ngorad rogon ni ngar folgad ko urngin e tin ni ke fil Jesus ngorad.​—Matthew 28:19, 20.

Rayog ni nge falfalan’ e pi gallabthir ni ma fafel e bitir rorad ni yad be yan u yaan e machib, ara yad be yan u yaan e welthin u nap’an e muulung, ara yad be yan u yaan e machib u mit e tabinaw. Ya ma maafthaliy e piin ni bitir e n’en ni yad be guy ni be rin’ e piin ni piilal u charrad. Pi fafel ni be tay e bitir ni yad be yan u yaan e machib e ma tamilangnag ni kan chuguliyrad nrogon ma “kan skulnagrad nrogon girdien Kristus.”​—Ephesians 6:4, Charles B. Williams.

Ba adag Jehovah ni nge un e piin bitir u fithik’ e girdi’ ni yad be liyor ngak. I yog Got ngak Moses ni nge un e “piin ni bitir” u nap’an ni kan bieg e Motochiyel. (Deuteronomy 31:12) Faanra un e bitir ko machib ma ra m’ug ko fafel ni yad be tay. Ma fare tir ni be yan u yaan e tamachib rok Got e ke tabab ko fare kanawo’ ni ra ayuweg ni nge mang reb e tamachib.