Gur Ku Rayog ni Nge Yog Ngodad e Bin Riyul’ e Pagan’?

BITIR e ma felan’ ni yad ma fafel e gallabthir rorad ni yad ba t’uf rorad​—mini’ e an nder felfelan’ ni ma guy ban’en ni aram rogon? Piin bitir e ma pagan’rad ni ba’ e gallabthir rorad ni ma runguyrad. Machane, boor e bitir, ni binem e ngal’an e felfelan’ e rib mo’maw’ ngorad. Ya bin ir, e boch e bitir e ri ma magafan’rad ni gubin e rran ko uw e yad ra pirieg e gin ni ngar molod riy e ro nep’ nem. Ere bay e athap ko pi bitir nem ni dariy taferad nge ku boch e girdi’ ni yad be par ni dariy e pagan’ rorad fa?

Yugu aram rogon nib dake dariy e athap ko gabul nge langlath, ma Thin rok Got e be pi’ e athap. Fare profet ni Isaiah ke mu’ i yog rok ni bayib reb e rran ni urngin e girdi’ e bayi par u fithik’ e pagan’ ni ke mus rogon. I yoloy ni gaar: “Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.”​—Isaiah 65:21, 22.

Machane gur re athap ney e ba’ kenggin nib mudugil? Ngan lemnag, ni fare bugithin ni “athap” e gathi gubin ngiyal’ ni be yip’ fan e pagan’. Ni bod rogon, u Brazil, ni baga’ ni yima rungaag fare thin ni yima gaar: “A esperança é a última que morre.” N’en ni ri fan e re n’ey, “Athap e aram e n’en ntomur ni ra yim’.” Re n’ey e ba sor fan ko boor e girdi’ ni ma par ni ri be athap ni yugu ra dariy kenggin e athap nib mudugil. Machane, fare athap ni ke pi’ fare Got nib fas ngodad e ba thil. Apostal Paul e yoloy ni gaar: “Dariy be’ ni ra tay e michan’ rok nga daken [Got] ni ra kireban’.” (Roma 10:11, NW) Pi yiiy nu Bible ni goo ke lebug ke mu’ e ke pi’ e pagan’ ngodad ni urngin e tin ke micheg Jehovah Got e ku ra riyul’. Nap’an ni ra yan’ i riyul’ e pi n’en kan micheg nem, ma fapi n’en ni ma suruy e bitir nguur pired u lan e kanawo’ e bay aw ni bogi ban’en ni ke thumur.

Ke mada’ ko chiney ma fare fonow nib puluw ni kan pirieg u Bible e ke ayuweg e piin baaram ni dariy e athap rorad ni ngar fal’eged rogon e yafas rorad mar pirieged e bin riyul’ e pagan’. Uw rogon ni rayog e re n’em? Pi Mich Rok Jehovah ko binaw rom e yad ra felfelan’ ni ngar ayuweged gur u rogon ni ngam pirieg e fulweg ko re deer nem.