Ga Be Yim’ ni Bochan e Fayleng ni Dakuriy e Marus Riy Fa?

“Gadad gubin e ‘ri gadad be kol ayuw ni gubin ngiyal’ ma . . . gad be thamiy ni dariy ban’en nrayog ni ngada rin’ed,’ ya bochan e riya’ . . . ‘ndaworda nanged nrayog ni ngeb nib tomgin ndemtrug ngal’an ma demtrug rogon ndani nog u m’on.’ ”

I THIN ney, ni kan fek ko fare babyor ni Newsweek fa binem e duw, e be dag e n’en ni be lemnag boor e girdi’ ni yad be par ko biney fayleng ni ke wagey. I weliy Jesus Kristus ni dabki n’uw nap’an ma ra yoor e lem ni aram rogon. I yiiynag ba ngiyal’ ni pi nam e ra gafgowgad nrib gel ma ra balyangan’rad ni dabra nanged ko uw rogon ni ngar milgad riy ma bayi aw e girdi’ nga but’ ko marus ni yad be sonnag e tin ra buch u fayleng. Machane de t’uf ni ngada rusgad ara uda lemnaged ni dakuriy ban’en nrayog ni ngada rin’ed, ya ke yog Jesus ni gaar: “Faanra tabab i m’ug e pi n’ey, mi gimed sak’iy ngam changargad nga lang, ya aram e ke chugur ni ngan chuwegmed u fithik’ e gafgow.”​—Luke 21:25-28.

Nap’an ni weliy rarogon e girdi’ rok u fayleng u tomuren ni kar thaygad ko re magawon nem, me yog Jehovah Got ni gaar: “Pi naun rok e girdi’ rok Got e bay un par riy u fithik’ e gapas ma dabi buch ban’en rorad, ma ke m’ay e magafan’ rorad.” (Isaiah 32:18) I yog Jehovah u l’ugun Mikah ni profet rok, ni gaar: “Gubin e girdi’ ni bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak.”​—Mikah 4:4.

Ra ngan taareb rogonnag e re n’em nga rarogon e yafas ko girdi’ e ngiyal’ ney ma rib thil! Ngiyal’ nem ma boch e riya’ ni dan nang ko mang nge wuin e ra yib e dabki magawonnag e girdi’. Dab kuura kol ayuwgad ma ra lemnaged ndariy ban’en nrayog ni ngara rin’ed ya ba yib e gapas nge felfelan’ ngorad ni manemus.