Ngalan e Abich Gathi Kemus ni Ngan Abich! U

RNGIN e girdi’ ma baadag e abich nib fel’. Ni faanra nap’an e abich ma yibe sabethin nib fel’ ma ga baadag ni kam chag ngak e girdi’ nib t’uf rom, ma aram e fare abich e ke mang ban’en nib falfalan’ ni gathi goo mak’iy rodad e ke gamaneg. Boor e tabinaw ni kar tayed ni nguur abichgad u taabang ni lich ni fen e taab yay u reb e rran. Ngalan e abich e ma pi’ e tayim ngak e tabinaw ni ngar weliyed e tini buch e rorran nem ara tin kan lemnag ni ngan rin’. Gallabthir ni ma motoyil ko n’en ma yog pi fakrad e yad ra sananag e n’en ni yad be tafinaynag nge lem rorad. Ra munmun, ma fare n’en ni un chag u nga l’an e abich ni yibe falfalan’ ma yibe toffan e ra ubung u lan reb e tabinaw e lem ko pagan’ ndariy ban’en nra buch nge pagan’ rorad ngorad nge t’ufeg ni ra taarebnag fare tabinaw.

Chiney, e bochan ni boor e tabinaw e ba yoor pa’ u puluwrad ni gubin ngiyal’ ni ba’ e n’en ni yad be rin’, e ke mo’maw’ ngorad ni ngar mada’gad nga taabang ko abich. Yuyang e fayleng, e yalen riy e ba kireb ni nge abich reb e tabinaw u taabang ara uni sabethin u nap’an e abich. Ma boch e tabinaw e ke mecham ni ngan pag e TV u nap’an e abich, ni aram e n’en ni ri ma chuweg e tayim rorad ko tin bay fan e sabethin.

Machane, gallabthir ni Kristiano, e gubin ngiyal’ ni yad ma fal’eg i guy e tayim ni ngar pi’ed gelngin chon e tabinaw rorad. (Proverbs 24:27) Kakrom, e nog ko pi gallabthir ni reb e tayim nib th’abi fel’ ni ngan weliy e thin rok Got ko bitir rorad ‘e ngiyal’ ni yad ba’ u naun rorad.’ (Deuteronomy 6:7) Ba mudugil ni kan par nga but’ u taabang ni ngan abich e ma pi’ e tayim nib th’abi fel’ ngak e gallabthir ni ngar tew nga laniyan’ pi fakrow e t’ufeg nib toar ni fan ngak Jehovah nge pi kenggin e motochiyel rok nib mat’aw. Ra ngam maruweliyed ni ngeb e felfelan’ me aw e gapas nga tabinaw romed, maku rayog ni ngam abichgad ni gimed ba felfelan’ ma ra gelnag e tabinaw romed. Arrogon, mu fal’eg ngal’an e abich nge par ni gathi kemus ni goo ngal’an ni ngan abich!