Uw Rogon ni Ngan Fanay Urngin e Rran ni Reb nge Reb ko Tin nib Ga’ Fan

“MU ayuwegmad nggu nanged feni ngoch nap’an ni nggu pired ko biney e tamilang, nge yog ni yib e gonop ngomad.” (Psalm 90:12) Aram e meybil rok Moses ni ta yol Bible u fithik’ e sobut’an’. Ri mang e be ning ko re meybil rok nem? Gur thingarda yibilayed e n’en ni aram rogon?

U verse 10, e be dag ni ke kireban’ Moses nbochan rib ngoch nap’an e yafas ko girdi’. Ba’ biyay, ni i yoloy e n’en ni yog Job, ni gaar: “Girdi’, e ba ngoch nap’an e yafas rok ma ke sug ko gafgow.” (Job 14:1, NW) Ba tamilang ni ri manang Moses nib ngoch nap’an e yafas ko girdi’ ni de flont. Ere, be ta’ ni gubin e rran ni ra reb e ba taw’ath nib tolang puluwon. Nap’an ni ke yog Moses e pi thin ney ma be dag ni baadag ni nge fanay e yafas rok ni ka ba’ u fithik’ e gonop, ngu kanawo’ ni ra felfelan’nag e En ke Sunmiy. Gur gathi kub t’uf ni ngada fanayed e pi rran ko yafas rodad ko tin nib ga’ fan? Ireray e n’en ni ngada athamgilgad ni ngada rin’ed ni faanra gad baadag ni ngada fel’gad u wan’ Got e ngiyal’ ney.

Immoy reb ban’en ni ku ke pi’ e athamgil nga laniyan’ Moses nge Job, ni ku rayog ni nge pi’ e athamgil nga lanin’dad. Gali pumoon ney e yow be sonnag e taw’ath ko gabul nge langlath​—ni aram e yafas u roy u fayleng nib fel’ rogon. (Job 14:14, 15; Hebrews 11:26) Ngiyal’ nem, dariy e maruwel ni nge tal ni bochan e yam’. Ba m’agan’ e En ke Sunmiydad ni ngada pared u paradis u fayleng ni manemus. (Isaiah 65:21-24; Revelation 21:3, 4) Maku ireray e athap rom ni faanra ‘ngam fanay e pi rran ko yafas rom u kanawo’ ni rayog ni nge yibnag e lem nib gonop’.