Ga Bod E Gek’iy ni Lagani Auna?

ULAN reb e binaw u wuru’ e binaw nu Port Moresby, Papua New Guinea, ma l’agruw e tapigpig ni yow be sul nga tabinaw u tomuren e machib ni kar tew. Nap’an ni yow be yan u but’, mar guyew ba ke gek’iy nib fel’ yaan. Ke yog fare pumoon ni gaar, “Ah, bake gek’iy ni lagani auna!” Me ni sap ko fare pagel, me ul’ul ngay ni gaar: “Re ngochol nem e fan e ‘gek’iyen e duw.’ Gathi taareb rogon nga boch e gek’iy, gubin e duw ma ma m’ay yuwan ma yira guy ma gowa ke yim’. Machane, nap’an ra aw e n’uw, ma ra beech yaan biyay, ma ra yib e floras riy, miki m’ug nib fel’ yaan.”

Bay ban’en nrayog ni ngan fil ko gek’iy ni lagani auna, ara sakura, nrogon ni yim nang. Rogon ni ma yog boch e girdi’ ni llowan’, e biney e gek’iy e ba muun nga lal mit e gek’iy ni ma yib e floras riy ni rib fel’ yaan u gubin yang u fayleng. Yugu aram rogon ni ma m’ay e floras riy nge yuwan u nap’an e yal’, ma re gek’iy ney e ma kunuy e ran. Lik’ingin e re gek’iy ney e ba gel nrayog ni nge tugul u dow e malang nib toar nga fithik’ e but’. Ireray kanawoen ma ba l’egl’eg lik’ingin ere gek’iy ney ma ba gel ma rayog ni nge par ni yugu demtrug gelngin e nifeng nra aw ngay. Ere, rayog ni nge par u fithik’ e nifeng nib gel.

Rayog ni ngad pirieged gadad ni aram rogon ni yibe skengnag gelngin e michan’ rodad. Mang e ra ayuwegdad ni ngada kadedan’dad? Taareb rogon ko lagani auna, rayog ni ngad unumed ma gad chaariy fare ran ni ma pi’ e yafas ni aram e Thin rok Got. Ba t’uf ni ngada chuchugurgad ngak Jehovah, ni ir e ‘manaf rodad,’ nge ulung rok. (2 Samuel 22:3) Riyul’, fare lagani auna e ma puguran ngodad ni yugu demtrug rogon ni gadad be par ko ngiyal’ ni bay e magawon, machane rayog ni ngad pared nib gel ko tirok Got ban’en nfaan gad ra athamgil ni ngad folgad ko fonow ni ma pi’ Jehovah e ngiyal’ ney. Faan gad ra fol riy, ma rayog ngodad e “tin ni yog Got nra pi’” ni aram e ke micheg, nib muun ngay e yafas ni manemus.​—Hebrews 6:12; Revelation 21:4.