Ke Pilibthir Machane Dar Kireban’

BOCHAN e pi n’en ni ma buch u nap’an ni kan pilibthir, ma boor e girdi’ ni ma yib e m’ar ngorad ni ma k’aringrad ni nge dabkiyog ni ngar rin’ed boch ban’en. Gathi ireram e n’en ni buch ku Fernand Rivarlo, ni yim’ ni ke gaman 95 e duw rok u Geneva, Switzerland. Ma par ni yigoo ir, ya ke yim’ leengin ma fak ni ppin e ke mabgol ni bay e naun rok ni ma par riy. Yugu aram rogon ni yugu ma par u tabinaw rok, ma de kireban’. Baga’ ni ma par u bochi tebel ni bay u naun rok, ni bay e dengwa u pa’, ni be dengwa nag e girdi’ ngii weliy murung’agen e thin rok Got ngorad.

Nap’an e yafas rok, ma ba’ ba ngiyal’ ni kan kalbusnag Fernand. Mang fan? Nap’an ni mang Fernand nge ppin rok l’agruw e Pi Mich nib pasig ko duw ni 1939, ma aram me tabab e Bin II e Mahl ko Fayleng u Europe. I fol Fernand ko n’en ni ke dugliy ni fan ko Bible ni dabi rin’ ban’en nib kireb ngak be’. Bochan e re n’em, me mul e maruwel rok u pa’ min non’ nga kalbus​—ni gaman lal nge baley e duw—​ma ireram e ngiyal’ nra dargow leengin e nge fachi ppin ni fak ni kab achig.

I sap ko n’en ni buch rok, me yog Fernand ni gaar: “Faanra sap e girdi’ ngay, ma bod ni kug pag e maruwel rog nib fel’ mug digey e tabinaw rog ndariy be’ ni nge ayuwegrad. I dabuy e girdi’ dakenag, ma ur sapgad ngog ni gag be’ ni ri gub kireb. Yugu aram rogon, ma ra gu sap ko pi duw nem, ma n’en ni ma yib ngan’ug u fithik’ urngin ban’en e rogon ni ayuwegeg Jehovah. Ke yoor e duw ni ke yan ma ka aram nap’an, ma pagan’ rog ngak Jehovah e kab gel e chiney ni wod ko ngiyal’ nem.”

Re michan’ ney e ke k’aring Fernand ni nge weliy e pi n’en ni be athapeg ni bay u lan e Bible ngak boch e girdi’ u telefon. Faan yow ra thin be’ nib fel’ rogon, ma aram me pi’ reb e babyor ni bay e thin nu Bible riy nge yan ngak faanem u post. Tomur riy, ma ra dengwa nag faanem bayay ni nge guy ko ba adag fare babyor fa. Yu ngiyal’ ma ma yol e girdi’ ngak ni yad be yog ni kar felfelan’gad ko pi babyor nem, ma re n’ey e ma k’aring e felfelan’ ngak.

Rayog ni nge non be’ ngom ni bod Fernand ko re binaw ni ga ma par riy. Mang ni dab mu motoyil ko n’en ni nge yog nbochan ni ngam nang e n’en nib mich u wan’? Pi Mich Rok Jehovah e yad ba felfelan’ ni ngar weliyed e michan’ rorad ngom.