Ngan Gay e Kanawo’ u Lan Bangi Day nib Ga’
FAPI donguch nu Marshall e nochi donguch ni 1,200, ma yooren riy e kemus ni in e feet tolngin u daken e day nga lang. Yira pag e nam ndawor ni palog ma dabkiyog ni ngan guy e yochi donguch ney. Machane, girdi’ ni yad ba ta ma milekag u m’uw u Marshall kakrom e yog nra milekaggad u thilin e yochi donguch ney, me yog nra pirieged wo’rad u lan 2 e milyon square kilometer u lan e day nu Pacific. Uw rogon nrin’ed e re n’ey? Ma pow’iyrad yuchi yang i “yaan e nam” ni kan nog e stick charts ngay.
Ke fil e pi paluw nu Marshall ney nra bay rogon e n’ew u maday ma be dag ni bay reb e donguch u lan 20 e mayel ko gin ni yad bay riy. Boor mit e n’ew nib t’uf ni ngar filed murung’agen, ma fapi stick charts ni yad ma fek e ma ayuwegrad. Uw rogon e pi stick chart nem? Rayog ni ngam guy aray ko sasing, ni aram yu chi yil’ i ban’en ni kan fal’eg ko likngin e choy’ ara niw kan m’ag m’ag nga taabang ni be dag yaan e pi n’ew nem. Ma bay yuchi kabil ni kan m’ag m’ag ngay ni be dag e gin ni bay reb e donguch riy nge reb.
Bokum e duw ni un mithag e pi stick chart ney ni yima fanay ko milekag u maday, ma kemus ni tamthath e girdi’ ni yad manang. Uw rogon nrayog ni nge fil reb e paluw ni kab pagal rogon ni nge fanay e stick chart? Kemus ni faanra ni fil ngak miki gay rogon ni nge fanay. Reb e paluw e ra mith nge fil rogon ngak e re pagal ney rogon ni nge fanay e re n’ey, e sana ra fek nga ranow ko milekag nga boch e donguch nib chuchugur. Nap’an ni ra nang fare pagal kanawoen fapi n’ew, ma ra pagan’ ko fare stick chart rok. Ma tomur riy ma rayog ni nge milekag u maday ni yigoo ir.
Taareb rogon ko Thin Rok Got, ni aram e Bible, ni rayog ni nge pow’iydad u lan e yafas rodad. Som’on e ra ayuwegdad be’ ni ngad nanged fan e pi thin u lan e Bible. Ma nap’an ni gad ra ul’ul i fil e Thin Rok Got ma gad fol ko pi kenggin e motochiyel riy, ma ra pagan’dad ko n’en ni be yog. Joshua ni ir e ba ga’ u Israel e nog ngak ni nge ul’ul i beeg e Thin Rok Got ya nge yog ni i “rin’ urngin ban’en ni ba’ riy ni kan yoloy.” ‘Ngemu’ me gaar Got ku Joshua “Ma pi n’en ni ga ra lemnag ngam dugliy e ra fel’, ma yira rin’ ma ra yan i fel’.” (Joshua 1:8) Arrogon, Bible e rayog ni nge dag ngodad e bin nib fel’ e kanawoen e yafas.
[Picture on page 32]
© Greg Vaughn