Arrogon, Mmom, machane Ba Puluw, Fa?

U NAP’AN e September 2005, ma fare Galesiya nu England e kar felfelan’gad ma kar ayuweged i wereg fare babyor ni The 100-Minute Bible (Fare 100 Minit Bible) fithingan. Kan fal’eg ni fan ni ngan beeg u lan 100 minit, fa ken nib beech e kan ngochnag fare Hebrew Scriptures riy ke yan i par ni 17 e guruy ma ra reb e guruy ma reb e page ma fare Greek Scriptures e 33 e guruy, ma kan chuweg yu yang riy ni ir e yog reb e pumoon ni ma beeg e babyor, ni aram e “yu yang ko Bible nib chalban i beeg.” Arrogon, mmom ni ngan beeg, machane ba puluw, fa?

Gathi kemus ni kan chuweg fithingan Got riy, ni Jehovah, ya faan ku ra fal’eg i yaliy e pi Bible student ma yad ra guy ni ke gel e thil riy. (Psalm 83:18) Ni bod ni, guruy ni 1, e be yog ni sunmiy Got e “tharmiy nge fayleng nib pag nel’ e rran.” Machane, Genesis 1:1, e yog ni gaar: “Nap’an ni tabab Got ngay ni nge sunumeg e fayleng nge urngin ban’en ni bay u lan e lang.” Bin migid e thin riy nrogon ni bay u lan e bin riyul’ e Bible e tin ni ka bay e maruwel ni rin’ Got nib muun ngay e fayleng, e rin’ u lan nel’ e “rran”. Ngemu’, me weliy e Genesis 2:4 (NW) n’umngin nap’an ni kan sunmiy urngin ban’en, ni “fare rran ni sunumeg Jehovah Got e fayleng nge lan e lang.”

Rogon ni yog fare babyor ni The 100-Minute Bible, e Job ni be’ nib yul’yul’, e “cham reb e tapigpig rok [Got] ngak ni aram Satan, . . . ni ir e mil fan ngak ni nga i gathibthibnag e girdi’.” Kam guy e n’en ni ba thil u roy? Fare bugithin ni “Satan” e be yip’ fan be’ nib “Tatogopuluw.” Satan e gathi tapigpig rok Got, ya tin riyul’ riy e ir e bin th’abi ga’ e toogor rok Got ma ir e ke mel’eg ni nga i gathibthib.​—Revelation 12:7-10.

Ma uw rogon fare Christian Greek Scriptures ko fare The 100-Minute Bible? U lan fare fanathin ni murung’agen e saf nge kaming, ma fa ken ni beech e be yog ni baadag Jesus e piin ma ayuweg e “girdi’ ni de ga’ farad,” machane tin riyul’ riy e yog Jesus nra tow’athnag e piin ni ma rin’ e tin nib fel’ ngak pi gachalpen​—ni aram ‘pi walagen.’ (Matthew 25:40) Fare Revelation ni kan ngochnag e yira beeg riy ni “Roma, ni fare Babylon nib gilbuguwan, e yira gothey.” Machane, pi Bible student e yad manang ni dariy ko tin som’on e yol ni ke yog ni Roma e ir fare “Babylon nib Gilbuguwan.”​—Revelation 17:15–18:24.

Piin ni yad be gay ni ngar nanged murung’agen e Ani Sunmiydad mar nanged e tin nib m’agan’ ngay, e ba t’uf ni ngar beeged e Bible ni polo’. Riyul’, nra ngan beeg e Bible ma ra pag 100 minit, machane ra un rin’ ni aram rogon ma ba ga’ angin nra yib. (John 17:3) Manga yugu um rin’ e re n’ey ma ga t’ar wom’engin nib fel’ ni fan ngom.​—2 Timothy 3:16, 17.