Kab Ga’ Fan ko Nga Nog Murung’agen e Yafang

OREN e pi nam e bay rarogon e yafang ni yad ma yog: Lan e lang nib row nnep’, e ma felan’nag e pi sala; lan e lang nib row ni kakadbul, e ma ginangrad. Piin ni ma fil murung’agen e yafang e ngiyal’ ney ara meteorologist e yad ma yog ko mang fan ni ma m’ug e yafang ni aram rogon ni bod ko fapi thin er nga lang.

U nap’an Jesus, ma girdi’ e ma fil murung’agen lan e lang ma rogned fan. I yog Jesus ngak boch piyu Jew ni gaar: “Ngiyal’ ni be n’en ni nge aw e yal’ e bay n’en me lungumed, Aram e bayi fel’ e yafang, ya ke row lan e lang. Ma kakadbul ni kakadbul e bay n’en me lungumed, Ra aw e n’uw, ya yu yang u lan e lang e ba row ma yu yang e ba talumor. Rayog romed ni ngam changargad nga lan e lang nga mogned rogon e n’en ni bay rin’ e yafang.” Machane i yog Jesus e thin nra pug lanin’rad ni gaar: “Dabiyog ni mu weliyed fan e pi pow ni ba’ rogon ko ngiyal’ ney!”​—Matthew 16:2, 3.

Mang e “pi pow ni ba’ rogon ko ngiyal’ ney”? Ereray e pi mich ni riyul’ ni Jesus e ir fare Messiah ni kan l’og ni yib rok Got. Mmom ni yira nang ko ngongol rok ni taareb rogon nga lan e lang nib row. Machane, yooren piyu Jew e darur tayedan’rad ko pi pow ni ke dag ni ke yib fare Messiah​—ni ban’en ni buch ni kab ga’ fan ko yafang.

Ngiyal’ ney, e ku bay ba pow ni kab ga’ fan ni ngan nang fan ko raen lan e lang. I yiiynag Jesus murung’agen e re fayleng ney nib kireb nra m’ay ya nge tabab reb e fayleng nib beech. I weliy boch ban’en nra buch me dag ko wuin e gonap’an ra thil e re n’ey. Ba muun ngay e mahl nge uyungol u ga’ngin yang e fayleng. Yog Jesus ni nap’an ni yira guy e pi n’en ney, ma ke chugur ni nge rin’ Got ban’en ni nge chuweg e magawon.​—Matthew 24:3-21.

Kam guy e “pi pow ni bay rogon ko ngiyal’ ney”?