Fare Gelngin Bolowthey

BOLOWTHEN e giraffe e 18 inches n’umngin mab papey ni ma mith mith, ma rayog ni nge luf yuwan e gek’iy. Fare bolowthen e blue whale e bod tomalngin ba elephant. Mu lemnag feni tomal ni ngan mith mitheg!

Ra ngan taareb rogonnag ga’ngin, nge tomalngin, nge gelngin nga bolowthen e girdi’ ma ra yan i aw nib m’ay fan bolowthen e girdi’. Machane, u reb e kanawo’ e rib gel gelngin. Yog e Bible murung’agen e gin’ ney ko dowef nib achichig ni gaar, “Yam’ nge yafas e be par u tan gelngin bolowthey.” (Proverbs 18:21, NW) Uw feni yoor yay ni kad rung’aged murung’agen gelngin bolowthen e girdi’ ni kan fanay ni nge yog e thin nde riyul’ ma ke kirebnagey, nge yam’ ni be tay e piin ndawora bucheged ban’en?

Maku, tha’ u thilin e girdi’ nib fel’ e kan kirebnag ko thin nra amithnag lanin’uy. Lem e kan kirebnag ko thin nib gel. Yog Job ni kari kireban’ ni gaar, “Mang ni gimed be gafgownigeg ko thin ni gimed be yog ngog?” (Job 19:2) James ni gachalpen Jesus e ke dag rogon ni ma kirebnagey bolowthey ndanir gagiyegnag ni gaar: “Ereray rogon bolowthey: aram feni achig, ma rayog ni nge weliy murung’agen bogi n’en ni ba ga’ murung’agen ni be weliy nib uf ngay. Aygum tafinayniged bangi gerger ni ba ga’ ni ba ga’ yang nrayog ni ngan urfiy nga bochi daramram nrib achig! Ma bolowthey e bod ba nifiy.”​—James 3:5, 6.

Maku, gelngin bolowthey e ku rayog ni nge ayuweg e yafas. Thin ni ma dag e runguy ma be fal’eg lanin’uy e ke ayuweg boch e girdi’ ko mochuch nge li’ be’ ir. Fonow nib fel’, e ke ayuweg e yafas rok boor e girdi’ ni ma fanay e drug nge girdi’ ni par u kanawo’ kar folgad riy. Riyul’, ni bolowthen e girdi’ nib mat’aw e bod e “gek’iy ko yafas,” nge “reb e thin nnog u ba ngiyal’ nib puluw ni bod yaan bogi arfath ni gol ni bay u lan e siko ni silber.”​—Proverbs 15:4; 25:11.

Machane, bin th’abi fel’ ni ngan fanay bolowthey ngay e ngan pining e sorok ngak Jehovah Got, min machibnag e thin nib fel’ ko Gil’ilungun Got, min fil ngak boch e girdi’ e thin riyul’ u Bible. Mang fan? Yog Jesus ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”​—John 17:3; Matthew 24:14; 28:19, 20.