Ma Yaliyem Got, Fa?

JEHOVAH, ni Rib Salap i Sunmiy ban’en, e bay gelngin ni nge guy ban’en, fa? Riyul’ ni bay gelngin! Fare Bible e be weliy nib tamilang ni gaar: “Gur En ke Sunmiy owchey, e dabiyog ni guy ban’en?” (Psalm 94:9, NW) Owchen Jehovah e kab gel nga owchen e girdi’ ndabi chuchugur. Gathi ke mus ni ma guy dowdad ya ku “ma fal’eg i yaliy e gum’ircha’,” ma rayog ni nge “nang fan e gum’ircha’.” (Proverbs 17:3, NW; 21:2, NW) Arrogon, bay gelngin ni nge nang lanin’dad, nge n’en ni be k’aring be’ ni nge rin’ ban’en, nge n’en ni be yim’ be’ nbochan.

Manang Jehovah e pi magawon nrayog ni ngeb ko yafas rodad, ma ma pi’ ngodad e pi n’en ni gadad be ning ngak. Yoloy fare psalmist ni gaar: “I Somol e ma matanagiy e piin ni yad mmat’aw, ma ma motoyil ngorad ko tin ni yad ma wenignag ngak.” (Psalm 34:15, 18) Ri ma fal’eg lanin’dad ni ngad nanged ni manang Jehovah e pi magawon rodad ma ma pi’ ngodad e n’en ni gad be ning ngak u fithik’ e yul’yul’!

Manang Jehovah Got e n’en ni kan rin’ nib mith. Arrogon, “urngin ban’en ni ke m’ay i sunumeg rok e be par u p’eowchen ndariy e upong u daken; mi ir e ri gadad ra weliy e pi n’en ni ud rin’ed ngak.” (Hebrews 4:13) Ere demtrug ko gad be rin’ e tin nib kireb ara tin nib fel’, ma manang Got ni urngin. (Proverbs 15:3) Ni bod ni, Genesis 6:8, 9 e be yog ni ba “fel’ Noah u wan’” Jehovah ma aram me “rin’ Noah urngin e tin ni yog Got ngak ni nge rin’.” Arrogon, ke fel’ Noah u wan’ Jehovah me flaabnag ya bochan ni ma fol ko kenggin e motochiyel rok Got nib mat’aw. (Genesis 6:22) Machane, girdi’ u nap’an Noah e dariy e runguy rorad mab kireb e ngongol rorad. Manang Got e re n’ey. I “guy Somol ni kari gel e kireb rok e girdi’ u gubin yang, ni gubin ngiyal’ ma ba sug lanin’rad ko tin nib kireb.” Tomur riy, me thang Jehovah e piin nib kireb machane i ayuweg Noah nge tabinaw rok ngar mageygad nib fas.​—Genesis 6:5; 7:23.

Ga ra fel’ u wan’ Jehovah fa? Riyul’ ni changar rok Jehovah e “ma yan u fayleng i yan ni fan ni nge dag gelngin ni fan ngak e girdi’ ni rib t’uf Got rorad.” (2 Kronicles 16:9, NW) Dabki n’uw nap’an ma ra chuweg bayay urngin e piin nib kireb ma ra ayuweg e piin nib sobut’ gum’ircharad.​—Psalm 37:10, 11.