Deer ko Piin Ma Beeg

Yugu aram rogon ni kan motochiyelnag ngak piyu Jew ni dab ra ked e “flowa ni kan tay e n’en ni ma thownag e flowa ngay” u nap’an e Paluk’af, ma mang fan ni fanay Jesus e wain​—nib mit e ban’en nib mugunin—​u nap’an ni ngongliy fare Madnom ko yam’ ni tay?​—Exodus 12:20; Luke 22:7, 8, 14-20.

Fare madnom ko Paluk’af ni yima tay ni be yip’ fan e ngiyal’ ni chuw piyu Israel u Egypt e ni tababnag ko duw ni 1513 B.C.E. Nap’an ni be yog Jehovah rogon ni ngan madnomnag e re madnom ney me gaar: “Thingar dab mu koyed e flowa ni ka nin’ e n’en ni ma thownag e flowa ngay; thingar mu ked e flowa nda nin’ e n’en ni ma thownag e flowa ngay u lan urngin e tabinaw romed.” (Exodus 12:11, 20) Re motochiyel ney e kemus nib l’ag rogon ko miti flowa ni yira kay u nap’an fare madnom ko Paluk’af. Dariy ban’en ni weliy u murung’agen e wain.

N’en ni fan ni motochiyelnag ndab ni kay e flowa ni kan tay e n’en ni thownag e flowa ngay e bochan e ba gur e machuw ni tay piyu Israel u Egypt. Be yog e Exodus 12:34 ni gaar: “Me fek piyu Israel e flowa rorad ni kan gelgiy nda nin’ e n’en ni ma thownag e flowa ngay ngar tiyed nga daken porad ni kar tiyed nga lan yu raba’ i ban’en ni tafen e flowa ma kar inged e mad rorad u wuru’.” Re n’em ndabin tay e n’en ni ma thownag e flowa ko flowa ni yira fanay u nap’an fare madnom e ra par nib puguran ngak pi fak pi fakrad.

Munmun, ma aram mi i sap e girdi’ ko fare flowa ni kan tay e n’en ni ma thownag e flowa ngay ni ban’en ni bay e denen ara kireb riy. Ni bod ni, nap’an ni be non apostal Paul ni ba sor fan ku be’ u lan e ulung ko Kristiano ni be ngongliy e ngongol ko darngal me yog ni gaar: “Ri buchuuw e is me thownag ba flowa ni polo’.” Ngemu’ miki ul’ul ngay ngki gaar: “Ere re is nir ni ke n’uw nap’an ni aram e denen ni be par u fithik’med e ngam n’iged nge yog ni mmachalboggad ni polo’. Ma aram mi gimed bod bangi flowa ni ka fin nni gelgiy ndariy e is riy, ya ri gu manang ni aray rogomed. Ere chiney ni kan pi’ Kristus ni maligach ni ir e ke mang saf rodad ko Paluk’af e aram e ke m’ay i fal’eg rogon e madnom rodad ni Paluk’af. Ere gathi flowa ni bay fa bin kakrom e is riy ni aram e denen nge ngongol nib kireb e ngad madnomniged e madnom rodad ngay, ya ngad madnomniged e madnom rodad ko flowa ni dariy e is riy, ni flowa ko machalbog nge tin riyul’.” (1 Korinth 5:6-8) Kemus ni yigoo flowa ndawor ni tay e n’en ni ma thownag e flowa ngay e rayog ni ngan fanay ni nge yip’ fan downgin Jesus nib flont.​—Hebrews 7:26.

Fare wain ni yima fanay ko fare madnom ko Paluk’af e ban’en ni fini uneg piyu Jew ngay ko tomur. Ni uneg e re n’ey ko fare madnom u tomuren nni pagrad u kalbus u Babylon. Bible e dar yog nib kireb e re n’ey ni kan uneg ko re madnom ney, ere rayog ni nge fanay Jesus e wain ko fare madnom ko Paluk’af. Arrogon, fare n’en ni ma muguninnag fare wain kakrom e ba thil ko n’en ni yima tay nga fithik’ e flowa. Faanra yibe fal’eg e flowa, mab t’uf ni ngan tay e is ngay ni faanra nge thow. Wain nni ngongliy ko grapes e de t’uf ni ngan tay e pi n’ey ngay. Ya gubin e pi n’ey e goo bay u fithik’ fapi grapes. Logowen e grapes ni kab beech e da un fanay u nap’an e madnom ko Paluk’af ni bochan e dabiyog ni nge par ndabi mugunin u nap’an e ngiyal’ ni kan t’ar nge yan i mada’ ko ngiyal’ ni Paluk’af.

Ere, wain ni fanay Jesus u nap’an e Madnom ko yam’ ni tay e dar togopuluw ko n’en ni motochiyelnag u nap’an e madnom ko Paluk’af. Demtrug e wain nib rowrow ndan tay e suga ngay ara ban’en ni nge gelnag ara yugu boch ban’en e ba puluw ni ngan fanay ni nge yip’ fan “rachaen” Kristus nib thothup.​—1 Peter 1:19.