‘Ngan Mon’og u Nap’an ni Ke Manna’ Chugey’

BOOR e girdi’ ko pi binaw nu Mediterranean ni ma yung e gek’iy ni date palm u lan e yoror rorad. Pi gek’iy ney e ba gilbuguwan nbochan nib fel’ yaan mab fel’ lamen wom’engin. Maku, ma yib wom’engin nib pag raay e duw.

Solomon ni Pilung nu Israel kakrom e weliy u fithik’ e fanathin rogon feni ga’ fan fare ppin nib pidorang ni Shulamite ni bod fare gek’iy ni palm tree. (Tang rok Solomon 7:7) Fare babyor ni Plants of the Bible (Gek’iy ko Bible) e gaar: “Fare thin ni Hebrew ni fan ko date palm e ‘tàmâr.’ . . . Ke mang pow rok piyu Jew ni fan ko fel’ yaan nib ga’ ni yima fanay ni ngochol ni fan ko bulyol nge fel’ yangaren.” Bod rogon, walagen Solomon ntaareb e chitamangrow ni kan tunguy fithingan ni Tamar. (2 Samuel 13:1) Boch e gallabthir e ka yad ma tunguy fithingan pi fakrad ni ppin ni aram rogon.

Ppin nib pidorang e gathi kemus ni kan taareb rogonag ko gek’iy ni palm. I tang fare psalmist ni gaar: “En nib mat’aw e ra puf ni bod e gek’iy ni palm ni ma puf; ma bod e cedar u Lebanon, ma ra ga’. Piin ni kan yungrad nga lan e naun rok Jehovah, u lan fare yoror rok e Got rodad, e bay ra mon’oggad i yan. Ma bay kuur mon’oggad i yan nge taw nga nap’an ni ke manna’ chugrad, yad ra par ni yad ba sugsug mab fel’ rogorad.”​—Psalm 92:12-14, NW.

Piin ni yad be pigpig ku Got u fithik’ e yul’yul’ u nap’an ni kar pilibthirgad e taareb rogon ko gek’iy ni palm. I yog e Bible ni gaar, “Chugey ni ke manna’ e ba fel’ yaan nfaanra kan pirieg ni be yan u kanawo’ nib mat’aw.” (Proverbs 16:31, NW) Yugu aram rogon ni ke war gelngirad ya kar pilibthirgad, ma rayog ni nge par ni yad ba gel ko tirok Got nfaanra ur beeged e Thin rok Got, ni fare Bible u gubin ngiyal’. (Psalm 1:1-3; Jeremiah 17:7, 8) Bochan e pi thin nge ngongol rorad nib fel’, ma piin pilibthir ni yad ba yul’yul’ e yad ma pi’ e athamgil nga laniyan’ boch e girdi’ ma ma dag wom’engin nib fel’ u gubin e duw, taareb rogon ko gek’iy ni date palm.​—Titus 2:2-5; Hebrews 13:15, 16.