Immoy e Bible rok Jesus, Fa?
DANGA, da immoy e Bible rok Jesus. Mang fan? Bochane Bible ni polo’ ni bay rodad e ngiyal’ ney e da i moy u nap’an Jesus. Machane, immoy e babyor ni kan bachiy ni baye thin riy u lane pi tafen e muulung ni ire mang bang ko Bible e chiney. I beeg Jesus e babyor ku Isaiah u lan tafen e muulung u Nazareth. (Luke 4:16, 17) I rung’ag apostal Paul nni “beeg fare Motochiyel rok Moses nge tin ni yoloy e pi profet” u Antiok u Pisidia. (Acts 13:14, 15) Maki yog James ni ir rebi gachalpen Jesus ni fapi yol ku Moses e “kan beeg u lan tafen e muulung i yan ni gubin e sabbath.”—Acts 15:21.
Immoy ko girdi’ e pi babyor ni kan bachiy ni baye Thin rok Got riy? Be m’ug ni immoy reb ko fa cha’ nu Ethiopia ni be’ nib eunuch u tafen e puf oloboch rok Kandace ni Leengin e pilung, ya nap’an ni ‘bay u daken e karrow ni be sul ma be beeg e thin ni bay ko fare babyor ni yoloy Isaiah ni profet’ me yib i mada’nag Philip u daken e kanawo’ u Gaza. (Acts 8:26-30) I yog apostal Paul ku Timothy ni nge ‘fek fa yu ke babyor, ni fa tinem ni yoloy e ri ra fek.’ (2 Timothy 4:13) Yugu aram rogon nde yog Paul ko tin ngan e babyor ni kan bachiy e ngan fek, ma rayog ni ireray yu yang ko fare Hebrew Scriptures.
Rogon ni yog Alan Millard, ni ir be’ ni ma fil murung’agen e thin ni Arabic nge Hebrew e, u fithik’ piyu Jew ma, piin ni immoy e pi babyor nem rorad ni kan bachiy e ba ga’ ni “pumoon nu Filistine, nib tolang e skul rorad, nge boche Farise nge sensey ni bod Nikodemus.” Fan ni aram rogon e bochan puluwon. I susunnag Millard ni “sogonap’an nel’ i yan ko ragag e denarii puluwon rebe babyor ku Isaiah” me yog nreb fare Bible nu Hebrew ni polo’ e sogonap’an “15 iyan ko 20 e babyor ni kan bachiy,” ma puluwon e taareb rogon nga puluwon be’ u baley e duw.
De yoge Bible ko immoy e Bible rok Jesus ara pi gachalpen fa danga’. Machane, dariye maruwar riy nri manang Jesus e thin u lane Bible nrib fel’ rogon, ma gubin yang riy nib mit ngak. (Matthew 4:4, 7, 10; 19:4, 5) Gathi ra k’aringdad ere n’ey ni ngar da nanged e Bible rodad nib fel’ rogon, yade tolang puluwon ma gubin yang ni bay riy?