Mu Chuchugur Ngak Got

Manang Rogon e Amith ni Be Tay Lanin’dad

John 11:33-35

“NGAN thamiy e kireban’ ku be’ e aram e amith rok ni bay u lanin’ug.” Aram rogon ni weliy reb e Pi Mich Rok Jehovah nib missionary ni ke pilibthir fan e re fel’ngin ney. Jehovah Got e aram e en nrayog ni ngad folwokgad rok u rogon ni ke dag ni be thamiy e kireban’ rok boch e girdi’. Ma thamiy e amith ni ma tay laniyan’ e girdi’ rok ni yad be gafgow. Uw rogon ni nge mudugil u wan’dad nriyul’ e re n’ey? Re fel’ngin ney ni bay rok Jehovah nib chagil e t’ufeg rok ngay e rib fel’ rogon ni ke m’ug u daken e thin nge ngongol rok Jesus u nap’an ni immoy u fayleng. (John 5:19) Mu lemnag e n’en ni ke buch ni bay u John 11:33-35.

Nap’an ni yim’ Lazarus ni fager rok Jesus, me yan Jesus nga lan e binaw rok Lazarus. Maria nge Martha ni walagen Lazarus e kari kireban’row. Rib t’uf e re tabinaw ney rok Jesus. (John 11:5) Ere, mang e ra rin’? Be gaar e Bible: “I guy Jesus Maria ni be yor, nge fapi cha’ nu Israel ni yad be lek ni ku yad be yor; me ri taganan’. Me fithrad ni gaar, ‘Ba uw e gin’en ni kam marod mchibgiliyed ngay?’ Mi yad fulweg ni lungurad, ‘Moy, Somol, ngam guy.’ Me yor Jesus.” (John 11:33-35) Mang fan ni yor Jesus? Riyul’ ni kem’ Lazarus ni fager rok, machane be n’en Jesus ni nge faseg ko yam’. (John 11:41-44) Ere gur, bay ban’en ni ki k’aring e kireban’ ngak Jesus?

Mu yaliy bayay fapi thin i er nga lang. Mu tay fanam i yan riy nnap’an ni guy Jesus Maria nge piin ni yad bay rok ni yad be yor, ma aram me ri “taganan’.” Fare bugithin ni kan fanay u roy e be dag e kireban’ nib gel.a N’en ni guy Jesus e rin’ ban’en ngak. Gelngin e kireban’ rok e m’ug u nap’an ni sug e lu’ nga owchen. Ba tamilang ni, kireban’ rok boch e girdi’ e rin’ ban’en nga gum’irchaen Jesus. Bay ba ngiyal’ ni kireban’um ngam yor ni bochan e be yor be’ nib t’uf rom, fa?​—Roma 12:15.

Kireban’ ni i thamiy Jesus e be ayuwegdad ni ngad filed e pi fel’ngin nge pi kanawo’ rok e Chitamangin, ni aram Jehovah. Dab mu pagtalin nib fel’ rogon ni dag Jesus e pi fel’ngin e chitamangin nge ni mada’ ko ngiyal’ nrayog ni nge gaar riy: “Cha’ ni ke guyeg e ke guy e en ni Chitamangiy.” (John 14:9) Ere nap’an ni gad ra beeg ni ke “yor Jesus,” ma rayog ni nge mudugil u wan’dad ni ma thamiy Jehovah e amith ni ma tay laniyan’ e pi tapigpig rok. Riyul’ ni ku be micheg yugu boch e piin ni ur yoloyed e Bible e re n’ey. (Isaiah 63:9; Zekariah 2:8) Jehovah e ir reb e Got nib sumunguy!

Gad baadag ni ngad chugurgad ngak e piin ni yad ma dag ni yad be thamiy e amith ni be tay laniyan’ boch e girdi’. Nap’an nra mulan’dad ara nap’an ni kad mochuchgad, ma gad ma chugur ngak e piin nrayog ni ngar nanged fan e magawon rodad maku yad ma thamiy e amith ni ma tay lanin’dad. Ma ri ka gad ma chugur ngak Jehovah, nreb e Got ni ma runguyey ma ma thamiy e amith ni ma tay lanin’dad ma manang fan ni gad ma yor!​—Psalm 56:8.

[Footnote]