Bay Boch e Kan ni Be Guydad​—Chon Mini’?

U Europe e bay reb e ppin ni ke pilibthir ni ma yan nga galesiya, ma fek e rosario, ma ma ragbug nge but’ nga p’eowchen reb e liyos ni yaan Maria. U Africa e bay reb e tabinaw riy ni yad ma puog e rrum u tooben e malang ko yam’ ko girdi’ rorad. U Meriken e bay reb e pumoon riy ni ma pag e abich nge yan i par nga bang ni goo ir, ya be athapeg ni nge non ngak ba engel rok ni ma matanagiy. U Asia e bay reb e prist ni ma urfeg e babyor nib thilthil ramaen ni nge mang maligach ko girdi’ rok kakrom ni kar m’ad.

FAPI girdi’ ni kan weliy murung’agrad, e mang e ke michan’rad ngay? Yad gubin ni ke michan’rad ni bay boch e kan ni rayog ni ngad nonad ngorad, ma bay gelngirad ni ngar ayuweged gadad ara ngar gafgownaged gadad. Riyul’ ni gathi ka fini sum e re machib ney, maku dab ni gin ngay. Machane n’en ni ngan gin ngay e boor ban’en ni yibe weliy nib thilthil u murung’agen e pi kan nem.

Muslim e yad ma meybil ngak Allah.a Kristiano nde riyul’ e yad ma yog ni Got e Trinitas, ni aram e Got ni Chitamangiy, nge Got ni Fak nge Got ni Kan ni Thothup. Girdi’ nu India e ke michan’rad ni boor ko taareb e biyu’ e Got ni bay. Ma yog boch e girdi’ ni bay e kan ni ma par u fithik’ boch e gamanman, nge yu ke gek’iy, nge malang, nge nochi pa’ i lul’. Maku bay boch e girdi’ ni ke mich u wan’rad e pi n’en ni kar beeged u boch e babyor, nge pi n’en ni kar guyed u kachido ni murung’agen e engel nge moonyan’ nge ku boch e got.

Ere boor rogon ni yibe lemnag murung’agen e pi got maku boor e kanawo’ ni yibe lemnag rogon ni ngan meybil ngorad. Gad manang ni gathi urngin e kanawo’ ni ngan meybil ngak Got e ba puluw. Ni bod u m’on ni ngad nonad ngak be’ u telefon, ma ba t’uf ni ngad nanged ko mini’ e cha’nem, ma ngkud nanged ni riyul’ ni baadag ni nge non ngodad. Ngan non ngak be’ nde riyul’ e dariy angin. Maku faanra ngan non ngak be’ ni be yan u lungun be’ ma bay e riya’ riy.

Ere mini’ e pi kan nem? Bible e gathi kemus ni be pi’ e fulweg ko re deer ney, ya ku be weliy ko mini’ e ngan non ngak nge mang angin nra yib. Aygum beeg e bin ni migid e thin. Sana ga ra gin ko mang e be yog e Bible u murung’agen.

[Footnote]