Ba Yiiy ni Rib Ga’ Fan

“Re thin nib fel’ ney ni murung’agen gil’ilungun Got e bay ni machibnag u gubin yang u fayleng ni nge urngin e girdi’ me nang, ma aram mfini taw e tomur.”—MATTHEW 24:14, NW.

PIIN llowan’ e ka rogned nrib ga’ fan e re thin ney. Ba ga’ fan e re thin ney ya be weliy murung’agen reb e maruwel ni yira rin’ u ga’ngin yang e fayleng. Maku ba ga’ fan e re n’ey ya be weliy murung’agen e n’en ni thingari rin’ e Kristiano ni aram e ngar machibgad ya aram e maruwel ni ngan rin’ u m’on ni nge yib fare “tomur” ni yog Jesus.

Re yiiy nem e ke lebug e ngiyal’ ney. Ma rib ga’ fan ngom ya fare thin nib fel’ e be piningem ma be ginangem. Rayog ni ngam dugliy ko ngam par u tan Gil’ilungun Got fa ngam togopuluw ngay. N’en ni ga ra mel’eg e ra yib angin ko yafos rom.

Ere ngad lemnaged e n’en ni buch u m’on ni yim’ Jesus, me yib pi gachalpen ngak mi yad fith murung’agen fapi n’en nra yib. Ri yad baadag ni ngar nanged ko wuin e ra yib fare Gil’ilungun Got ara gagiyeg rok Got ni aray e n’en nib ga’ ni ma weliy Jesus murung’agen. Maku yad baadag ni ngar nanged murung’agen e “ngiyal’ ni ke chugur nga tomuren e re m’ag ney,” ma boch e Bible e ma yog ni “tomuren e fayleng.”—Matthew 24:3, American Standard Version; King James Version.

Ke yog Jesus ngorad ni yira rung’ag lingan e mahl nib chugur nge mahl nib orel, nge uyungol, nge m’ar nib machreg ni ma af, nge durru’ nib gel. Miki yog ni bayi wer ko girdi’ e tin nib kireb, ma boor e girdi’ ni bay ra folgad ko pi tamachib ni googsur ma yira fanenikay e tin riyul’ e Kristiano min gafgownagrad.—Matthew 24:4-13; Luke 21:11.

Machane ki immoy murung’agen fare thin nib fel’. Ya bin migid e ki weliy Jesus murung’agen fare thin ni bay ko Matthew 24:14 ni aray e n’en ni ke k’aring e girdi’ ni ngar fal’eged i lemnag mar rin’ed ban’en. Yugu aram rogon ni manang e girdi’ nib ga’ fan e thin rok Jesus, machane de fel’ u wan’rad fan e pi thin nem. Ere mang fan e re thin nib fel’ nem? Mang fare Gil’ilungun Got? Wuin e ra lebug e re yiiy ney, ma mini’ e ra lebguy? Ma mang fare “tomur”? Ngad guyed.

[Picture on page 3]

Facsimile of the Washington Manuscript of Four Gospels. Matthew 24:14 is highlighted

[Credit Line]

Kan fek ko fare babyor ni Facsimile of the Washington Manuscript of the Four Gospels in the Freer Collection 1912