Rayog ni Nge Ayuwegdad e Ngiyal’ Ney

“Thin rom e ba magal ni be pow’iyeg, me ir e tamilang ko kanawo’ ni gu be yan riy.”​—PSALM 119:105.

UW ROGON NIB THIL E BIBLE? Boor e babyor nib fel’ e thin ni bay riy machane dabiyog ni ngad fanayed ni nge fonownagdad. Mus ko pi babyor ni ma yog rogon ni ngan fal’eg ban’en e yu ngiyal’ mab t’uf ni ngan thilyeg e thin riy ni nge puluw. Bible e ba thil “ya urngin ban’en nni yoloy nga lan e babyor nib thothup e ni yoloy ni nge fonownagdad.”​—Roma 15:4.

BOD ROGON NI: Yugu aram rogon ni Bible e gathi reb e babyor ni kan fal’eg ni nge fonownigey u rogon ni ngan par ni dabi yib e m’ar, machane bay e thin riy ni faanra yira fol riy ma nrayog ni ayuweg lanin’uy nge fithik’ i dowey. Ni bod ni gaar: “Gapas laniyan’ e ma fal’eg fithik’ i dowey.” (Proverbs 14:30, BT) Ku be ginangey e Bible ni gaar: “Girdi’ nda rir m’aged yad ngak boch e girdi’ e goo yad e yad ma lemnaged yad; ma der ma m’ag u wan’rad e tin goo yimanang nib fel’. ” (Proverbs 18:1, BT) Maku be gaar: “ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35.

PI N’EN NI KAN PIRIEG: Gapas lanin’uy, nge tha’ nib fel’ u thilmew e fager rom, nge ngan gol ngak e girdi’ e rayog ni nge ayuweg fithik’ i dowam ni nge par nib fel’ rogon. I yog reb e babyor ni gaar: “Mom ni nge yib e m’ar ni stroke ngak reb e pumoon ni faanra i par nib damumuw. Ma be’ nib moon ni manang rogon ni nge ayuweg ir ko damumuw e mo’maw’ ni nge yib e stroke ngak.” (Journal of the American Medical Association) Kan fal’eg reb e study u lan ragag e duw u Australia ma kan pirieg ni ba ga’ ni piin pilibthir ni “boor e pi fager rorad nib fel’ ma kub fel’ e numon u thilrad” e yad ma par nib n’uw boch nap’an. Maku kan pirieg ko duw ni 2008 u Canada nge Meriken ni “boor e felfelan’ ni ra yib ngak be’ ni faanra ngam fanay e salpiy rom ni fan ngak yugu boch e girdi’ ma gathi goo gur.”

MANG E GA BE LEMNAG? Ra pagan’um ko fonow u rogon ni ngam ayuwegem ko m’ar u reb e babyor ni ke gaman 2,000 e duw ni ke yan, fa? Ara, ba thil e Bible nga yugu boch e babyor?

[Blurb on page 8]

“Rib ga’ fan e Bible u wan’ug . . . ya boor e fonow u murung’agen rogon ni ngan ayuwegey ko m’ar ni bay riy nib fel’.”​—HOWARD KELLY, M.D., FOUNDING FACULTY MEMBER OF THE JOHNS HOPKINS UNIVERSITY SCHOOL OF MEDICINE