Mang Fan ni Ma Meybil e Girdi’?

Gur, ga ma meybil ni gubin ngiyal’? Re deer ney e fan ngak yooren e girdi’ ni kub muun e piin nde mich Got u wan’rad ngay. Ere, mang fan ni ma meybil e girdi’? Nap’an nni fith e re deer ney ngak boch e girdi’ nu France, ma baley ko pi girdi’ nem e ka rogned ni fan ni yad ma meybil ara fan ni yad ma fal’eg i lemnag boch ban’en yu ngiyal’ e bochan ni nge “fel’ lanin’rad.” Bod rogon yooren e girdi’ nu Europe e darur meybilgad ni bochan ni yad baadag ni ngar liyorgad ngak Got, machane, kemus ni yad ma meybil ya nge yag ni nge “baud lanin’rad.” Maku bay e girdi’ ni yad ma meybil ngak Got u nap’an ni ke t’uf e ayuw rorad, ma yad ma lemnag ni ngan fulweg taban e meybil rorad nib papey.​—Isaiah 26:16.

Me gur, uw rogon u wan’um? Ga ma lemnag ni meybil ni ga ma tay e aram reb e kanawo’ nra ayuwegem nge yag ni ngam lemnag boch ban’en nib fel’ rogon? Faanra ba mich Got u wan’um, ma ga ma guy angin e meybil ni ga ma tay, fa? Ara, ga ma lemnag ni danur fulweg taban e meybil rom? Rayog ni nge ayuwegem e Bible ngam nang ni meybil ni ga ma tay e gathi kemus ni ban’en ni ga ma rin’ ni nge fal’eg lanin’um, machane ireram reb e kanawo’ nrayog ni nge chugur e tha’ u thilmew Got riy.