Mang Fan ni Nge Ga’ Fan Gil’ilungun Got u Wan’dad?

Bokum milyon e girdi’ u ga’ngin yang u fayleng e be pagan’rad nga Gil’ilungun Got. Yad ma folwok ko n’en ni rin’ Jesus ni fil ngak pi gachalpen rogon ni ngar meybilgad ni gaar: “Me yib gil’ilungum ngomad. Min rin’ e tin nib m’agan’um ngay u fayleng.”​—Matthew 6:10, King James Version.

Ere, yugu aram rogon ni boor e girdi’ nib ga’ fan Gil’ilungun Got u wan’rad, machane yooren e teliw e de ga’ fan u wan’rad. H. G. Wells ni be’ ni ma fil murung’agen e chep kakrom e yog “feni rib ga’ fan . . . fare machib ni murung’agen Gil’ilungun Got” u wan’ Jesus, machane, biney e machib e “rib thil nga rogon e . . . machib ni be tay e tin ni ka bay e teliw ni yad ma yog ni yad e Kristiano.”

Pi Mich Rok Jehovah e yad ba thil ko pi yurba’ i teliw, ya ba ga’ fan Gil’ilungun Got u wan’rad. Mu lemnag e re n’ey: Reb e babyor rodad nib ga’ ni ir e ga ma beeg e kan ngongliy nga 220 mit e thin. Ra reb e Wulyang ko Damit mab chugur ni nge gaman 46 milyon ken ni kan fal’eg. Ma re babyor ney e kan wereg u ga’ngin yang u fayleng. Mang kenggin e machib ko re babyor ney? Kenggin e re babyor ney e aram e: Fare Wulyang ko Damit Ni Be Weliy Morngaagen Gil’ilungun Jehovah.a

Mang fan ni ma athamgil e Pi Mich Rok Jehovah ni ngar weliyed murung’agen Gil’ilungun Got ko girdi’? Reb i fan e ba mich u wan’mad ni Gil’ilungun Got e aram kenggin e machib ni bay ko fare ke babyor nth’abi ga’ fan ni aram e Bible. Ma bin riyul’ riy, e ba mich u wan’mad ni kemus ni Gil’ilungun Got e rayog ni nge chuweg e pi magawon ni be mada’nag e girdi’ e ngiyal’ ney.

Bochan nib ga’ fan Gil’ilungun Got u wan’ e Pi Mich Rok Jehovah, ma aram fan ni yad ma athamgil ni ngar folwokgad rok Jesus. Nap’an ni immoy Jesus u fayleng ma n’en nth’abi ga’ fan ko yafos rok e aram e nge machibnag murung’agen Gil’ilungun Got. (Luke 4:43) Mang fan nib ga’ fan Gil’ilungun Got u wan’ Jesus? Ma mang rogon e re n’em ngom? Gamad be piningem ni ngam guy e fulweg ko pi deer ney u Bible, nrogon ni kan weliy ko tin migid e article.