PI DEER NI BAY E FULWEG RIY U BIBLE

Ra uw rogon e par ko girdi’ boch nga m’on?

Dariy e maruwar riy ni be mon’og e llowan’ ko girdi’ i yan. Machane, gur rayog ko girdi’ ni ngar sunmiyed reb e ulung ni urngin e girdi’ riy ni yad ma ayuweged yad? Dabiyog. Ngiyal’ ney e ke sug e fayleng ko ngongol ni fel’ ngak nge chogow. Machane, bay ban’en ni ke tay Got ni fan ko girdi’ boch nga m’on.​—Mu beeg e 2 Peter 3:13.

Be weliy e Thin rok Got murung’agen reb e ulung nra par u fayleng boch nga m’on ni gubin e girdi’ riy ni yad ma t’ufeged yad. Ra taw ko ngiyal’ nem ma urngin e girdi’ ni yad ra par u fithik’ e pagan’, ma dakuriy be’ nra gafgownagrad.​—Mu beeg e Mikah 4:3, 4. 

Uw rogon ni yira chuweg e ngongol ni fel’ ngak?

I sunmiy Got e girdi’ ndariy e lem ni fel’ ngak rorad. Machane, bochan nde fol e gal nsom’on e girdi’ rok Got, ma aram fan nda kur parew ni yow ba flont. Ere, fare lem ni fel’ ngak e ke af rok Adam ngodad. Yugu aram rogon, ma ra fanay Got Jesus ni nge sulweg e girdi’ ngkur flontgad bayay.​—Mu beeg e Roma 7:21, 24, 25.

I m’agan’ Got ngay ni nge yim’ Jesus ya nge mang ba maligach ni nge chuwegdad u tan gelngin e denen ni ke af rok Adam ngodad. (Roma 5:19) Ere, ke ayuwegdad Jesus ni nge yag e athap ngodad boch nga m’on ko ngiyal’ nra par e girdi’ ndakuriy e biney e lem rorad ni yad baadag ni ngaur rin’ed e kireb.​—Mu beeg e Psalm 37:9-11.