Ba Tow’ath ni Kab Fel’ ko Gubin e Tow’ath

YIRA yaliy e chi bowoch ni baaray ni fen e m’uth pencil ni ke kol Jordan ma gowa ban’en ni gathi rib fel’. Machane, re n’ey e ban’en nrib ga’ fan u wan’. I weliy Jordan ni gaar, “Re n’ey e pi’ Russell ngog u nap’an ni ku gub bitir. Cha’nem e ir be’ nib fel’ e thin rorad chon e tabinaw rog.” Tomuren ni yim’ Russell, ma aram me yan i nang Jordan ni cha’nem e ir be’ nrib ga’ fan u wan’ e tutuw nge gallabthir rok ni bochan e i ayuwegrad u boch e magawon ni i yib ngorad. Ki ulul Jordan ngay ni gaar, “Chiney ni kug nang boch ban’en u murung’agen Russell e kari ga’ fan e re tow’ath ney u wan’ug.”

Ba tamilang ko n’en ni kad weliyed u murung’agen Jordan ni bay boch e girdi’ ni gathi rib ga’ fan fa reb e dariy fan u wan’rad e tow’ath ni ke pi’ be’ ngorad. Machane, en nrib ga’ fan fare tow’ath u wan’ e rayog ni nge lemnag ni fare tow’ath ni kan pi’ ngak e ban’en nrib tolang puluwon ara ban’en ndabiyog puluwon. Baaray reb e thin nu Bible ni boor e girdi’ ni manang ni be weliy murung’agen ba tow’ath ni ke pi’ Got ndabiyog i susunnag puluwon. Be gaar: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:16.

Ba tow’ath nra yognag e yafos ndariy n’umngin nap’an ngak e en ni yira pi’ ngak! Ga be lemnag ma bay reb e tow’ath ni kab pag feni ga’ fan ko re tow’ath ney, fa? Yugu aram rogon ni bay boch e girdi’ ndar nanged feni ga’ fan e re tow’ath ney, machane tin riyul’ e Kristiano e rib ga’ fan u wan’rad ara yad ma tay ni ban’en nrib “tolang” puluwon. (Psalm 49:8; 1 Peter 1:18, 19) Ere, mang fan ni pi’ Got Fak ni nge mang tow’ath ni fan ko girdi’ nu fayleng?

Ke tamilangnag apostal Paul e fulweg riy ko pi thin ni baaray ni be gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng.” (Roma 5:12) Adam ni ir e bin som’on e girdi’ ni immoy e denen nib togopuluw ngak Got ni lem rok ma aram me yib wenegan ngak ni yam’. Mu daken Adam e af e yam’ riy ngak urngin e girdi’ nu fayleng.

“Denen e ma pi’ puluwoy​—ni yam’; machane tow’ath rok Got ngodad ndariy puluwon e yafos ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.” (Roma 6:23) Ere, pi’ Got Jesus Kristus ni Fak ni nge yib nga fayleng ni nge pi’ e yafos rok nib flont ni nge biyuliy e girdi’ ngay me chuwegrad u tan gelngin e yam’. Bochan e re tow’ath nem ni aram fare biyul, ma aram e gubin e piin nra mich Jesus u wan’rad me m’ug ko ngongol rorad, e ra yag e yafos ndariy n’umngin nap’an ngorad.​—Roma 3:24.

I weliy Paul murung’agen e pi tow’ath nra pi’ Got ngak e pi tapigpig rok u daken Jesus Kristus ni gaar: “Ngad pininged e magar ngak Got ko tow’ath ni ke pi’ ngodad ndabiyog puluwon!” (2 Korinth 9:15) Arrogon, rib ga’ fan fare biyul. Ere, aram fan ndabiyog rodad ni ngar da tamilangnaged feni ga’ fan. Machane, mang fan ni fare biyul e aram e re tow’ath nth’abi fel’ u fithik’ urngin e tow’ath ni ke pi’ Got ko girdi’? Uw rogon nib thil ko tin ni ka bay e tow’ath ni ke pi’ Got?a Ma mang e susun ni ngad rin’ed ko re tow’ath ney? Gamad be pi’ e athamgil nga lanin’um ni ngam guy e fulweg ko pi deer ney ni kan fek u Bible ni bay ko gal ni migid e article.