Fa aningeg i yol ni yima yog e Tetragrammaton ngay ni aram fithingan Got nib thothup ni Jehovah ko yol ni Hebrew ni kan yoloy ko mat’aw i yan nga gilay’
Rayog ni Nge Pagan’dad Nra Lebug e Tin Ke Micheg Got u Daken e Bin Th’abi Achig e Yol ni Hebrew
Gur, rayog ni nge pagan’dad nra lebug gubin ban’en ni ke micheg Got? Rib mich e re n’ey u wan’ Jesus, ma pi n’en ni i machibnag e i ayuweg e piin ni ur motoyilgad ngak ni nge gel e michan’ rorad. Am lemnag fare fanathin ni weliy ko fare Welthin Rok u Daken e Burey ni bay ko Matthew 5:18 ni be gaar: “Mu ted fanmed i yan ko re bugithin ney! N’umngin i nap’an ni ka be par e tharmiy nge fayleng e dariy bochiyang u reb e yol ara bochiyang ko fare Motochiyel nra nn’ag—ya fin ra taw nga tomren urngin ban’en.”
Bin th’abi achig e yol ni bay u fithik’ e pi yol ni Hebrew e י (yod), ni aram e bin som’on e yol ni bay ko fa aningeg i yol ni yima yog e Tetragrammaton ngay, ni aram fithingan Got nib thothup ni Jehovah.a Pi tamachib ko motochiyel nge pi Farise kakrom e yad ma tay nrib ga’ fan e thin nge pi yol ni bay u lan fare Motochiyel rok Got ni kub muun ‘bochiyang u reb e pi yol’ nem ngay.
Be yog Jesus ni kab mom ni nge chuw e tharmiy nge fayleng ko bin ni nge dabi lebug bochiyang ko fare Motochiyel. Machane, be micheg e Bible nra par e tharmiy nge fayleng ndariy n’umngin nap’an. (Psalm 78:69) Ere, re thin nem ni yog Jesus e be tamilangnag ni dariy bochiyang ko fare Motochiyel nra yan i par ndabi lebug.
Gur, ba ga’ fan u wan’ Jehovah nochi ban’en nib achig? Arrogon. Am lemnag e re n’ey: Nog ngak piyu Israel kakrom nthingar dab ra t’ared reb i yilen e fak e saf ni ngan fanay ni fan ko Paluk’af. (Exodus 12:46) Re n’ey e sana ban’en ni gathi rib ga’ fan u wan’ boch e girdi’. Machane gur, yad manang ko mang fan nnog ngorad ndab ra t’ared reb e pi yil nem? Dabisiy ni danga’. Machane, manang Jehovah Got nre n’em e bay rogon ko n’en ni yiiynag e pi profet u murung’agen fare Messiah ni aram e dariy reb e yil rok ni yira t’ar u nap’an ni yira li’ nge yim’ u daken fare ley i gek’iy.—Psalm 34:20; John 19:31-33, 36.
Ere, mang e gad be fil ko fapi thin ni yog Jesus? Rayog ni nge pagan’dad nra riyul’ gubin e pi n’en ni ke micheg Jehovah Got ngki mada’ nga nochi ban’en riy nrib achig. Ere, dariy e maruwar riy nrayog ni nge pagan’dad nra lebug e pi n’en ni ke micheg Got u daken e bin nth’abi achig e yol ni Hebrew!
a Bin nth’abi achig e yol ni bay u fithik’ e pi yol ni Greek e iota, ma taareb rogon e re yol nem ko fare yol ni Hebrew ni י (yod). Fare Motochiyel rok Moses e ni yoloy ngemu’ mu kun abweg nga yu yang e babyor ni yibe yoloy ni thin ni Hebrew. Ere, ba mudugil ni be weliy Jesus murung’agen e yol ni Hebrew.