Dab Mu Tinna’!
1 Nap’an ni gad be n’en ni ngad uned ko machib u mit e tabinaw iyan ma bin th’abi mo’maw e mab ni gad ra yib ngay e aram e birodad e mab. Sana gad be lemnag ni dabiyog rodad ni ngad weliyed e thin nriyul’ ko “urngin mit e girdi’.” (1 Tim. 2:4) Machane susun dabda tinna’gad ni ngad wereged fare thin nib fel’. Mang fan?
2 Aram e Thin Rok Jehovah: I weliy Jehovah e thin rok u daken e Bible. Nap’an ni gad ma weliy e re thin ney ko girdi’ ma gad be weliy e thin rok, gathi thin rodad. (Rom. 10:13-15) Nap’an ni ma togopuluw e girdi’ ko fare thin ko Gil’ilungun Got, ma yad be togopuluw ngak Jehovah. Machane, dabi mulan’dad ngay. Ya ke mich u wan’dad ni re thin ney e ra taw nga gum’erchaen e piin ni ba adag ni nge thil rarogon e fayleng ma yad manang nib t’uf rorad e tirok Got ban’en.—Ezek. 9:4; Matt. 5:3, 6.
3 Ma Pow’iy Jehovah e Girdi’ Ngar Bad Ngak: Be’ ni ke dabuy ni nge motoyil ngodad kafram ma sana ra adag e chiney ya ke thil salpen ma ke munguy gum’erchaen. Ere ra felan’ Jehovah ngak ma ra ‘pow’iy e cha’nem nge yib ngak.’ (John 6:44, 65) Nap’an nra buch e re n’ey ma gad ba adag ni nge fanaydad Jehovah ma ngad paged e pi engel ngar pow’iyed gadad ngak e pi girdi’ ni aram rogon.—Rev. 14:6.
4 Ma Pi’ Jehovah e Kan ni Thothup Rok Ngodad: Kan ni thothup e ma pi’ gelngidad ni dabda “rusgad ya Jehovah e pi’ gelngidad.” (Acts 14:1-3) Ra par u lanin’dad ni aram e n’en ni be tay tanggidad ko machib, ma aram e dabda tinna’gad ni ngad weliyed e thin riyul’ ko piin buguli yoror rodad, nge girdi’ u tabon e maruwel rodad, nge girdi’ u skul, nge girdi’ rodad, fa piin nib tolang e skul rorad, ara piin nib fel’ rogon.
5 I Fil Jesus Rogon Ngodad: I fith Jesus boch e deer ni ra pug e tafinay ko girdi’, me weliy e fanathin nib m’ag, ma i weliy fan e thin ko Bible. I weliy e thin nriyul’ uw rogon nib mom ni ngan nang fan, ma yira adag, me weliy e thin u gum’erchaen. Ku aram rogon nib fel’ ni ngan rin’ ko ngiyal’ ney. (1 Kor. 4:17) Ba thilthil rogon e machib ni gad ra tay, machane dabi thil fare thin ko Gil’ilungun Got ni gad ma wereg.
6 Gad ba taw’ath ya be fanaydad Jehovah ni ngad ayuweged e girdi’ uw rogon nib baga’ fan. Dabda tinna’gad! Dabdad rusgad ma ngad paged Jehovah nge “bing e kanawo’ nge yog ni ngada machibnaged” fare thin nib fel’ ko girdi’—Kol. 4:2-4.