Gimed e Piin Fel’ Yangaren e Mang e Gimed Ra Rin’ ni Fan ko Yafas Romed?

¹ Faanra gur reb e fel’ yangaren ma dabisiy ni ga ma lemnag e n’en ni ga ra rin’ ko gabul nge langlath. Be yog e Proverbs 21:5 ni ‘en ra lem nib fel’ rogon e ra fel’ rogon riy.’ Ere ra fel’ rogom ni faan ga ra fal’eg i lemnag e tin ni ga be nameg ni fan ko yafos rom. Dab mu pagtalin e pigpig ku Jehovah u polo’ e tayim u nap’an ni ga be lemnag boch ban’en ni fan ngom ko gabul nge langlath. Mang fan?

² Ga ra fith e piin ur uned ko pioneer u nap’an ni kab fel’ yangarrad ko uw rogon e pioneer u wun’rad mab mudugil ni yad ra gaar ngom: “Aram e ngiyal’ nri gu felfelan’ nib gel!” Reb e walag ni pumoon ni ke pioneer ni ka nap’an e ngiyal’ nib fel’ yangaren keb i mada’ ko chiney e gaar: “Rra felfelan’ be’ ni faanra i fol ko fare fonow nu Bible ni gaar: ‘Mu lemnag e en ni sunumiyem ko ngiyal’ ni ka gab pagel.’” (Eklesiastes 12:1) Ra ga baadag ni ngam felfelan’ ni aray rogon, ma thingar mu maruwelgad e gallabthir rom u taabang e chiney ni kab fel’ yangarem.

³ Piin Fel’ Yangaren, Mmon’eged e Pigpig u Polo’ e Tayim: Gimed e piin fel’ yangaren e de t’uf ni nge magafan’med nga rogon e pioneer. Ya demtrug e ngiyal’ u nap’an e skul fa nap’an ni kan tal ko skul nrayog ni ngam uned ko auxiliary pioneer. Gimed ra rin’ ni aram rogon ma gimed ra nang rogon e felfelan’ ni ma tay e piin pioneer! Rayog ni ngam guy rogon ngam un ko auxiliary pioneer u ba ngiyal’ ko chiney i yan nge mada’ ko ngiyal’ ni kan tal ko skul?

⁴ Faan gur reb e pagel u lan e ulung, ma ngam lemnag rogon nrayog ni ngam mang reb e ministerial servant. (1 Timothy 3:8-10, 12) Ku rayog ni ngam turguy ko ga baadag ni ngam maruwel u Bethel, ara mu un ko Ministerial Training School u nap’an nra taw ko duw rom fa. Tin ni ga ra fil u nap’an ni ga ra un ko pioneer e boor ban’en ra ayuwegem riy ni bod rogon ni ngam yarmiy e tayim rom nge boch ban’en, nge rogon ni nga i par nib fel’ thilmed boch e girdi’, nge rogon ni ngam tiyan’um ko pi n’en ni kan pag gafalngin ngom. Pi n’ey e ra ayuwegem nge yog ni yoor boch e maruwel nim rin’ ni fan ko pigpig ni ga ra tay ngak Got boch nga m’on.

⁵ Ra m’ag urngin ban’en ni ga be rin’ ko pigpig ni ga be tay ngak Got ni faanra ba pasigan’um ko tirok Got ban’en. Ke pi’ apostal Paul e athamgil nga lanin’dad ni gaar: “Demtrug e n’en ni gimed ra ngongliy ma ngam tedan’med ngay, ni gowa gimed be maruwel rok Somol, ma . . . dab mpaged talin nra pi’ Somol puluwon ngomed.” (Kolose 3:23, 24) Manga yigi tow’athnagem Jehovah nge yog ni felfelan’um ni ngam pigpig ngak u polo’ e tayim rom!