“Pi Pumoon ni Yad ba Tow’ath” e Yad Ma Lemnag ni Ngar Gafaliyed Fare Ran’ i Saf Rok Got

¹ Rib fel’ ni ke pi’ Jehovah e ayuw u daken Fak me pi’ e “pi pumoon ni yad ba tow’ath”! (Eph. 4:8, 11, 12) Boor e maruwel ni be mil fan ngorad, nib muun ngay ni ngar gafaliyed fare ran’ i saf rok Got nib m’agan’rad ngay. (1 Pet. 5:2, 3) Gad gubin ni ke fel’ rogodad ko re ayuw ney ni ri ba t’uf rodad. Demtrug ni faanra bay e magawon rok e girdi’, ni ka fin yad be cheg ko ulung, ara yad ba meewar, ara kar mal’afgad rok Got, ya pi pumoon ney e yad ma lemnag rogon ni ngar ayuweged gubin e girdi’ ko tirok Got ban’en.​—Fil. 2:4; 1 Thess. 5:12-14.

² Faanra buch ban’en nib gel e magawon u fayleng me magafan’ e girdi’ ngay, ma ra par e pi tachugol e saf ney ni yad “bod ba manaf ni ngan naf ngay ko nifeng nge yoko’.” Faanra ke magafan’dad ara ba tomal lanin’dad ma ba t’uf rodad ni ngan fl’eg lanin’dad, ma yad ra ayuwegdad ni “yad ra bod e yu pa’ i lul’ ni bay u daken bangi ted nder tugul ban’en riy” ara “yad bod e tagalul’ u ba war ni ba ga’ ni bay u daken bangi ted nder tugul ban’en riy.”​—Isa. 32:2.

³ Ngan Pi’ e Athamgil Nga Laniyan’ e Piin ni Yad Ba Inactive: Ma athamgil e piin ni piilal ni ngar pied e athamgil nga laniyan’ e girdi’ ni kar manged e girdi’ ni irregular ara inactive, ma yad ma ayuwegrad ni ngar sulod i un ko ulung nge machib biyay. Bochan e ke yan e piin ni piilal ko shepherding calls ma kar ayuweged boor e girdi’ ni ngar sulod mar uned ko muulung biyay mar ayuweged yad ngar gelgad ko tirok Got ban’en mar uned ko machib u mit e tabinaw biyay. Urngin e maruwel ni ke tay e piin ni piilal e be micheg me dag e t’ufeg rok Jehovah nge gagiyeg rok Jesus Kristus. Ke dag Jesus rogon ni ke lemnag e saf rok ni ke sor nga bang.​—Matt. 18:12-14; John 10:16, 27-29.

⁴ Fapi tachugol e saf e yad ma tiyan’rad ko pi pow ni be dag ni be war be’ iyan ko tirok Got ban’en. Girdi’ ni ma dag ni ke mulan’rad, ara der ma un ko muulung u gubin e wik, ara der ma un ko machib u mit e tabinaw e ba ga’ ni ba t’uf e ayuw rorad ko tirok Got ban’en. Ri ba adag e piin ni piilal ni ngar ayuweged e piin ni yad be ngongliy nifengin e fayleng ko munmad nge piyan lolugey ara piin ni ma gun’gun’ u murung’agen e ulung. Piin ni piilal ni ba t’uf e girdi’ rorad e yad ra pi’ yad nga pa’ e girdi’ ni ngar ayuweged yad ngar sulod ngar pared nib t’uf Jehovah rorad biyay.​—1 Thess. 2:8.

⁵ Kafram ma boch e Kristiano ni kar ognaged yad ku Got e kar sorgad nga bang ko ulung, ma kar paged e maruwel ko tirok Got ban’en ya kaygi gel e magawon rorad ko m’ar, salpiy, ara magawon ko tabinaw rorad. Ra tamilangnag e piin ni piilal u fithik’ e gol ni ba t’uf gubin e saf rok Got ma ra ayuwegrad ko ngiyal’ nib gel e magawon rorad. (Ps. 55:22; 1 Pet. 5:7) Pi tachugol e saf ni yad ba od e rayog ni ngar ayuweged e girdi’ nge tamilang u wan’rad ni faan yad ra “chugur ngak Got, me chugur” ngorad me fl’eg lanin’rad.​—Jas. 4:8; Ps. 23:3, 4.

⁶ Ngan Tay Fan e Piin ni Yad Ba Mugutgut: Pi tachugol e saf ni ba t’uf e girdi’ rorad e ku yad ma lemnag u murung’agen e girdi’ ni yima pag. U lan gubin e ulung ma bay be’ nib mugutgut, ni be par u lan e nursing home ma dabiyog ni nge yan nga ba yang. Ba tamilang ni ba mo’maw’ ni ngar wereged e thin u murung’agen Gil’ilungun Got ni bochan salperad. Sana ke mus nrayog ni ngar machibnaged e girdi’ ko ngiyal’ nra yib be’ nge guyrad, ara yugu girdi’ nib m’ar u lan e naun, ara girdien e maruwel ni ma ayuwegrad. Urngin e machib nrayog ni ngar ted e aram e ayuw ni ba ga’ ko machib ni yibe tay u ga’ngin yang e fayleng. (Matt. 25:15) Mus ko 15 minit ni kar machibnaged be’, ma susun ni ngar ted ko report rorad, ma yira theegrad ni yad e pi publisher ko Gil’ilungun Got.

⁷ “Pi pumoon ni yad ba tow’ath” e ri yad ma tiyan’rad ko tirok Got ban’en nib t’uf rok e pi walagrad e ngiyal’ ney​—ni aram e ngiyal’ ko fare Puguran. Ri ba puluw ko re ngiyal’ ney ni ngar ayuweged urngin e girdi’ ni kar sorgad nga ba yang nge yog e falfalan’ nge gapas nga lanin’rad ni bochan e kar chaggad ko ulung biyay! Ke falfalan’mad ko ngiyal’ ni ngguyed ni be un “girdien e tabinaw rok Got” ko muulung nge machib u mit e tabinaw, ni yad be dag nib mich e biyul ni tay Kristus u wan’rad.​—Gal. 6:10; Luke 15:4-7; John 10:11, 14.