Ngan Weliy ko Girdi’ u Murung’agen e Yalen ko Gum’eyag
1 U boor e binaw ma pi yalen ko gum’eyag e ba togopuluw ko machib ko Bible u murung’agen e yam’. Bay reb e walag ni ppin u Samoa ni girdi’ rok e kar togopuluwgad ngak u nap’an ni be fl’eg rogon ko gum’eyag ko bitir rok ni fak, machane girdien e ulung e kar ayuweged ma aram ma ke par nib mudugil ko thin nriyul’. Rogon ni yarmiy e pi walag fare gum’eyag e ba math keru’ ko yalen ko piyu Samoa, machane pi pilung ko binaw e kar ngatgad nga rogon ni ke ayuweg e Pi Mich fare tabinaw, u m’on nge tomren fare gum’eyag. Maku ri ba adag e pi pilung uw rogon ni kan tay fare gum’eyag ma aram ma kar turguyed ni ngar thiliyeged e yalen rorad ko gum’eyag nge puluw ko Faa-Molimau a Ieova (The Way of Jehovah’s Witnesses).
2 Ku aram rogon nrayog ni nge buch ngodad uw rogon ni gad ma tay e gum’eyag. Machane gathi ba mom ni ngan weliy ko girdi’ rodad ara piin buguli yoror rodad u murung’agen e yalen ko gum’eyag. Boch e girdi’ ma ke gelan’rad ko re n’ey ni bochan e machib ni googsur u murung’agen rarogon e yam’. Bay dalip i n’en nra ayuweg ngan weliy fan ko pi girdi’ nem: (1) ngan fl’eg rogon; (2) ngan weliy reb ara l’agruw e thin ko Bible; ma (3) ngan fanay e pi babyor ko ulung.
3 Ngam ayuweg be’ nge nang fan rarogon e yam’ ma ngam gaar:
◼ “Kaamu lemnag ko mang e ke buch ko piin nib t’uf rodad ni kar m’ad? [Mu pag nge fulweg.] Rayog ni nge tamilangnag e Bible e pi deer rodad u murung’agen e yam’. [Mu bieg—Eklesiastes 9:5, 10.] Mang e be fil ngodad u murung’agen rarogon e yam’? [Mu pag nge fulweg.] Amu guy ko mang e be weliy e re ke babyor ney u murung’agen e yam’. [Mu pining facha’ ni nge bieg paragraph 1 ko Guruy ni 12 ko fare babyor ni God’s Friend! ] Ga be lemnag ni baga’ fan ni ngan nang ko mang e be yog e Bible? [Mu pag nge fulweg.] Gu ra sul ma ngad weliyew ko mang e be yog e Bible u murung’agen e piin nib t’uf rodad ni kar m’ad.”
4 Ku baaray yugu reb e thin nrayog ni ngam mog u nap’an ni ngam sabethingow e girdi’ rom ara be’ ni buguli yoror rom:
◼ “Ga be lemnag ni gad ra guy biyay e girdi’ nib t’uf rodad ni kar m’ad? [Mu pag nge fulweg.] Mu tiyan’um ko mang e be yog e re ke babyor ney u murung’agen ba ngiyal’ nib falfalan’. [Mu pining ni nge bieg paragraph 3 ko Guruy ni 12 ko fare babyor ni God’s Friend!] Gu ba adag ni nggu dag ngom ban’en ni i micheg Jesus ni ra faseg e girdi’ ko yam’. [Mu bieg John 5:28, 29.] Boor ban’en ni be weliy e Bible u murung’agen e piin nib t’uf rodad ni kar m’ad. Gu ra sul ma rayog ni nguuda weliyew u murung’aen e re n’ey.”
5 Rib fel’ fare babyor ni God’s Friend! ni ngan weliy ko girdi’ u murung’agen e yalen ko gum’eyag. Faanra kam pi’ reb e babyor ngak reb e girdi’ rom ara girdi’ ni buguli yoror rom, ma ngam gayiy rogon ni nguum weliyew u murung’agen. (1 Tim. 4:16) Ngam mel’eg reb ara l’agruw e thin nib mom ni bay ko re ke babyor nem ma ngam fl’eg rogon ni ngam weliy e thin ko Bible. Susun, rayog ni ngam gaar:
◼ “Fa yay nem ma kad weliyew u murung’agen mang e ma buch ko piin nib t’uf rodad ni kar m’ad. Be weliy e Bible ni kar m’ad ma bod rogon ni yad be mol, ma dabiyog ni ngar rung’aged ban’en, ara ngar guyed ban’en, ara ngar nonad. Uw rogon u wan’um, susun ni re n’ey e bay rogon ko uw rogon ni gad ma tay e gum’eyag? [Mu pag nge fulweg.] Ngad guyew ko mang e be weliy ko re babyor ney. [Mu pining facha’ nge bieg paragraph 2 ko Guruy ni 12 ko fare babyor ni God’s Friend!] Ga manang boch e yalen ko gum’eyag ni ma rin’ e girdi’ ni ngan felan’nag e piin nib t’uf rorad ni kar m’ad? [Mu pag nge fulweg.] Be weliy ni pi yalen ney e de fel’ u wan’ Got ya kar sumgad ko reb e ban rok Satan. Ga manang ko mang e ke bannag Satan? [Mu bieg e bin som’on e sentence ko paragraph 4.] Aram fare ban ni bay ko Genesis 3:4. [Ngan bieg.] Tin ni ka bay e thin ko Guruy ni 12 e be weliy ko uw rogon u wan’ Got u nap’an ni ma un e girdi’ ko pi yalen ni yibe rin’ ni ngan felan’nag e yam’.”
6 Fare Society e ma pi’ boch e babyor ni be weliy e thin ko Bible ni nge ayuwegdad ngad weliyed ko girdi’ u murung’agen e yam’ nge yalen ko gum’eyag, ma rayog ni nge taw nga gum’erchaen e piin nib yul’yul’ ni be gayiy e thin nriyul’. (Heb. 4:12) Boch e babyor ni ra ayuwegdad ngad tababnaged e sabethin e aram fare babyor ni God’s Friend! nge pi tract ni What Hope for Dead Loved Ones? nge Do You Have an Immortal Spirit? Maku boor e girdi’ e ma pi’ e pi babyor nem ko girdi’ ni ma un ko gum’eyag ko Kristiano.
7 Pi yalen ko binaw ko gum’eyag e aram e “thin nde riyul’ ni be togopuluwnag e girdi’ ngak Got” ma aram e pi n’en ni be magwonnag e pi Kristiano. (2 Kor. 10:4, 5) Machane, nap’an ni gad ma par nib mudugil ko machib ko Bible, ma gad ma pining e sorok ku Chitamangidad nu tharmiy. Maku gad be ayuweg e girdi’ ngar nanged e thin nriyul’ ni ra pithigrad ko pi yalen nde puluw ko Bible ma ma pi’ e magawon.—John 8:32.