Rayog ni Ngam Tababnag e Bible Study u Daken fare Babyor ni Rayog ni Ngam Par ni Gab Fas u Paradis u Fayleng?
1. Uw rogon ni ngan tababnag e Bible study ko yay ni som’on ni ngan machibnag be’?
1 Susun ni ngad guyed rogon ni ngad tababnaged e Bible study ko ngiyal’ ni som’on ni ngad machibnaged e girdi’ ma ngad fanayed e babyor ni Rayog ni Ngam Par ni Gab Fas u Paradis u Fayleng. Mang e ba l’ag ngay? Gathi ke mus ni gad ra wereg e babyor, ya ku gad ra athamgil ni ngad weliyed boch e paragraph ngak e girdi’ ma ngad yarmiyed ni ngad sulod i weliy yugu boch e thin.
2. Uw rogon ni ngad fanayed e pi sasing ko page 11-13 ko fare babyor ni Rayog ni Ngam Par ni Gab Fas u Paradis u Fayleng ni ngad tababnaged e machib u Bible?
2 Rayog ni ngad tababgad ni ngad pithiged e babyor ko pi sasing ko page 11, 12, nge 13 ma ga yog ni ngam gaar, “Ri ra manigil ni faan ra riyul’ e pi sasing ni baaray fa? Ma ga fith, “Faanra bay gelngin ni ngam rin’, mang magawon ni ga ra yal’uweg?” Mu tay telim ko fulweg nra pi’. Faanra dag faanem ni baadag e machib, mu dag e pi n’en ni be fil e Bible ko paragraph 14 ko page 14. Tomren ni kam bieg Psalm 145:16, mu weliy nra tamilangnag e babyor ni Rayog ni Ngam Par ni Gab Fas u Paradis u Fayleng ko uw rogon nra lebug e re thin ko Bible nem.
3. (a) Faanra kam machibnag e thin ni bod e thin ni bay ko paragraph 3, ma uw rogon ni ke fulweg e girdi’? (b) Mang yugu boch e machib ni kam fanay ni ngam tababnag e Bible study ko yay ni som’on ni kam machibnag e girdi’?
3 Ra yib angin ni ngam fanay fare babyor ni ngam weliy e machib ko Bible. Baga’ ni baadag e girdi’ ni nge par e tabinaw rorad nib felfelan’, ere rayog ni ngam fith ngorad ni ngam gaar, “Uw rogon u wan’um, ra felfelan’ e tabinaw ni faanra fol e girdi’ ko re thin ko Bible ney?” Mu bieg Efesus 5:53, ma ga pag ni nge pi’ e fulweg. Ma aram mu weliy paragraph 2 nge 3 ko page 238. Ngiyal’ ni ngam weliy e thin riy, ma ga be tababnag e Bible study.
4. Faanra kam tababnag e Bible study ko yay ni som’on ni ngam mada’nag e girdi’, ma uw rogon ni ngam yarmiy ni ngam sul ngorad?
4 Mu Yarmiy ni Ngam Sul Ngak e Girdi’: Nap’an e ngiyal’ ni ngam musnag e study ko yay ni som’on, mu yarmiy ni nguum machibnag ni ngam gaar: “Ke mus in e minit ma kad filed ban’en nib ga’ fan ni be fil e Bible. Yay ni migid ni nggu sul, ma rayog ni ngad weliyed [mog e deer ni ga ra weliy ko yay ni migid]. Rayog ni nggub biyay ko binem e wik fa?” Mu yarmiy ni ngam sul biyay, ma dab mu pag talin. (Matt. 5:37) Tomren in yay ni ke fil faanem e Bible, mu tabab i fil e babyor u tabolngin nge yan ko tomur.
5. Mang e susun ni ngad rin’ed nfaanra dabun be’ ni nge un ko fol Bible ko yay ni som’on ni kad mada’gad?
5 Faanra kam pi’ e babyor ni Rayog ni Ngam Par ni Gab Fas u Paradis u Fayleng ku be’ machane dabun ni nge un ko fol babyor ko yay ni som’on ni kam machibgow, ma rayog ni ngam nameg ni ngam sul i tababnag e Bible study.