“Ba Uw e Gu Ra Pirieg e Tayim?”

¹ Aram rogon e tafinay rok boor i gadad, ya boor ban’en ni thingar da rin’ed. Yima yog ni tayim e bin ni baga’ fan rodad ma aram ban’en ni ma yan nib papey. Ere, ba uw nrayog ni ngad pirieged e tayim ni fan ko tin ni rib ga’ fan, ni bod rogon e fol babyor ni Thin Rok Got?​—Fil. 1:10.

² Dab da gayed boor boch e tayim, machane ngad dugliyed ko mang e gad ba adag ni ngad rin’ed ko tayim ni bay rodad. Ke mus ni bay 168 e awa ko reb e wik, ma gad ma fanay 100 ni fan ko mol nge maruwel. Ere uw rogon ni ngad fanayed e tayim ni ka bay nge yog angin ngodad? Be weliy e thin ko Efesus 3:15-17 ni “dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop. Urngin yay nra mab e kanawo’ ngomed ma ngam maruwelgad ngay ni fan ko tin nib fel’ . . . , ngam nanged e n’en nib m’agan’ Somol ngay ni ngam rin’ed.” Pi thin ney e be tamilangnag ni ba t’uf rodad ni ngad fanayed gubin ngiyal’ nra mab e kanawo’ ngodad ngad rin’ed e tin ni i yog Jehovah.

³ I taarebnag Jesus e ngiyal’ ku Noah ko ngiyal’ ney. (Luke 17:26, 27) Ya girdi’ ko ngiyal’ nem e goo yad be tiyan’ ko pi n’en ni yibe rin’ u reb e rran nge reb. Machane, i turguy Noah ni nge fanay e tayim ni nge toy e arke nib ga’ ma i wereg e machib. (Heb. 11:7; 2 Pet. 2:5) Uw rogon ni i rin’? I mon’eg e tin nib m’agan’ Got ngay u wan’ ma i fol rok “me rin’ urngin e tin ni yog Got ngak ni nge rin’.”​—Gen. 6:22.

⁴ Mang e Susun ni Ngan Mon’eg? Yog Jesus ni ke gaar: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos.” (Matt. 4:4) Ma yib e “ggan [tirok Got ban’en] ko ngiyal’ ni yima pi’ riy” ngodad u gubin e wik. (Luke 12:42) Ere ra nge fel’ rogodad riy ma ba t’uf ni ngad bieged i fil u gubin e wik nge tamilang gubin ban’en u wan’dad. Bochan e gad ma tay fan e ggan ko tirok Got ban’en, ma dab da lemnaged ni aram e ggan ni ngad ked nib papey ni bod rogon ni gad ma rin’ ko ngiyal’ ni boor pa’ u puluwdad. Ya tay fan nib puluw e ra k’aringdad ndab da papeygad i fil tirok Got ban’en.

⁵ Ra ngad ked e ggan ko tirok Got ban’en ma rayog e yafos ni dariy n’umngin nap’an ngodad. (John 17:3) Susun ni ngad ted ni aram bang ko pi n’en ni gad ma rin’ u reb e rran nge reb. Rayog ni ngad yarmiyed e tayim ni ngad bieged e Bible u gubin e rran ma ngad fl’eged rogon ko muulung ko Kristiano fa? Arrogon, rayog rodad. Ma aram, ma ra yog “puluwan” ngodad ya gad ma nang ma gad be rin’ e tin nib m’agan Got ngay.​—Ps. 19:7-11.