Rogon ni Ma Ayuwegdad fare Muulung ni Fol Babyor
1. Uw rogon ni ma ayuwegdad lal’ e muulung ni yima fl’eg u gubin e wik?
1 Ra reb e muulung ko lal’ e muulung ni yima tay u gubin e wik e ba thil nga rogon ni yima fl’eg nge pi n’en ni yima fil ngodad. Machane ba ga’ fan urngin e muulung ya ma ayuwegdad “nge bagadad ma ngi i lemnag bagadad, ma nge bagadad ma ngi i ayuweg bagadad ma be dag nib t’uf rok ma be rin’ e tin nib fel’ ngak.” (Heb. 10:24, 25) Mang boch felngin e Muulung ni Fol Babyor ni ke fel’ rogodad riy?
2. Uw rogon ni ke fel’ rogodad ko muulung ni fol babyor ni kab buchuw e girdi’ riy?
2 Ra Ayuwegdad Ngad Mon’oggad i Yan ko Tirok Got Ban’en: Kab buchuw e girdi’ ni ma un ko muulung ni fol babyor ko yugu reb e muulung. Ere kab mom ni ngam chugur ngak yugu boch e girdi’ ngam fagergad ma aram ban’en ni ma ayuwegem ko tirok Got ban’en. (Prov. 18:24) Kam mu guy rogon ni ngam nang gubin e girdi’ ko muulung ni ga ma un ngay, ma ga piningrad ngar uned ngom ko machib u mit e tabinaw? Maku, rayog rok fare overseer ni nge nang salpen ra reb e girdi’ ko re muulung ney me pi’ e athamgil nga lanin’rad.—Prov. 27:23.
3. Uw rogon ni ma k’aring fare muulung ni fol babyor e pi Bible study ni ngar uned ko muulung mar pied e fulweg?
3 Kam mu pining e Bible study rom ni nge un ngom ko muulung ni fol babyor fa? Sana piin nib tamra’ ni dubrad ni ngar uned ko muulung ni bay boor e girdi’ riy e yad ra un ko muulung ni fol Bible ni kab buchuw e girdi’ riy ni yima fl’eg u tafen be’. Bochan buchuw e girdi’ riy mab fel’ thilrad ma ra mom ko pi bitir nge tin biech e girdi’ ni ngar pied e fulweg. Maku bochan e ba achig e ulung ma rayog ni nge yoor e fulweg ni ngad pied ma ngad pininged e sorok ku Jehovah.—Ps. 111:1.
4. Uw rogon ni ma k’aring e muulung ni fol babyor ni nge mom boch ban’en ni fan ngodad?
4 Ba ga’ ni yima fl’eg e muulung ni fol babyor ko gin nib mom ni ngan un ngay. Yugu aram rogon ndabiyog ni ngan tay ni gubin e girdi’ e ra un nga gin ni kari chugur u taferad, machane ra ngad folgad ni ngad uned ko fol babyor ni kan nog ngodad ni ngad uned ngay ma ba ga’ ni kab chugur e milekag riy ko yugu reb e muulung. Gin ko fol babyor e ku rayog ni ngan dugliy ni aram e gin ko muulung ko machib u mit e tabinaw.
5. Uw rogon ni ra yog ngodad e ayuw ko machib u mit e tabinaw rok e overseer ko fol babyor rodad?
5 Ra Ayuwegdad ko Machib u Mit e Tabinaw: Ba adag fare overseer ko fol babyor ni nge ayuweg ra reb e girdi’ ni nge un ko machib u mit e tabinaw u gubin e pul, me rin’ u rogon nib m’agan’ ngay, me par nib felfelan’. Me ere, ra guy rogon ni nge un ngak ra reb e girdi’ ko fol babyor rok, me pi’ e ayuw ko yu kanawo’ i machib. Faanra ba’ e magawon rom ko reb e kanawo’ ko machib, ni bod e return visit, ngam mog ngak e overseer ko fol babyor rom. Sana rayog ni nge yarmiy ni ngam un ko yugu reb e publisher nib ilal ko tirok Got ban’en. Ga ra mon’og i rogon ni ngam fil e tin riyul’ ngak e pi Bible study rom ni faanra tiyan’um ko salap rok e overseer ni be fl’eg e muulung.—1 Kor. 4:17.
6. Mang fan ni susun ni ngad guyed rogon ni nge fel’ rogodad ko yaram ko muulung ni fol babyor?
6 Ri ba flaab fare Muulung ni Fol Babyor ko ulung! Re yaram nib t’uf rok Jehovah ney e ra ayuwegdad nguuda pired nib mudugil ko tirok Got ban’en ko ngiyal’ ney nib mo’maw’ e par riy.—Ps. 26:12.