Ke Micheg ni Ba Gel e Michan’ Rok!

1. Mang boch ban’en nib kireb ni yog Jesus nra buch?

¹ I motoyil e pi apostal rok Jesus ngak u nap’an ni be weliy murung’agen e ngiyal’ ni bay riy nge ngiyal’ ni tomren e re m’ag ney. Bayi buch bogi ban’en nib kireb ko girdi’​—mahl, uyungol, durru’, liliy. Bin migid, e yog Jesus ngak pi gachalpen ni yira fanenikayrad, min gafgownagrad, min thang e fan rorad. Bayi yib boor profet ni goo bogi ban’en ngar bannaged boor e girdi’. Ma rogon nib t’uf be’ rok be’ e bayi meewar.

2. Mang fan ni yira ngat ngay ni fare thin nib fel’ e yibe wereg u gubin yang u fayleng?

² Bochan e pi thin nem ma dabisiy ni gin e pi apostal u nap’an ni yog Jesus ni yira machibnag fare thin nib fel’ u murung’agen e Gagiyeg rok Got u gubin yang u fayleng. (Matt. 24:3-14) Ngiyal’ ney, e gad be guy rogon ni be lebug e re yiiy nem. Yugu aram rogon ni gad be par u ba ngiyal’ nib mo’maw’ e par riy, ma Pi Mich Rok Jehovah e yad be wereg fare thin nib fel’ u fithik’ e pasig. Yugu aram rogon ni be meewar e t’ufeg rok e girdi’ nu fayleng, machane gadad e be gel e t’ufeg rodad i yan. Ma yugu aram rogon ni be fanenikaydad “urngin e girdi’,” machane gad be machib u gubin e nam.

3. Mang boch ban’en ni ga be guy ko Report ko Maruwel ni Yibe Tay u Gubin Yang e Fayleng ni be pi’ e athamgil nga lanin’um?

³ Rib fel’ ni ngan sul nga daken e maruwel ni ke tay e Pi Mich Rok Jehovah ko fa binem e duw ni bay ko chart ko page 3 nge ni mada’ ko page 6! U lan 16 e duw ma kan tay reb e bilyon e awa ko fare maruwel ni ngan machibnag e girdi’ ngar manged pi gachalpen Jesus. Ireray e mich riy nib gel e michan’ ko Pi Mich Rok Jehovah! Ke mun 5.8 pasent e girdi’ ni kar uned ko pioneer, ma 3.1 pasent e ke un ko publisher, ma 4.4 pasent ko Bible study. Ma 20.1 pasent e kar uned ko taufe u lan fa binem e duw. Rib fel’ ni ngan guy ni ke chugur ko medlip e milyon e girdi’ nib yul’yul’ ni yad be pigpig ku Jehovah​—ni kari gel e yoor riy e chiney nga reb e tayim u nap’an chepin e girdi’! Faanra mu yaliy e chart, ma mang e ga be guy ni be pi’ e athamgil nga lanin’um?

4. Mang boch e magawon ni ke gel be’ ngay u nap’an ni be mon’og i yan me un ko taufe?

⁴ Yugu aram rogon ni boor e pi namba ney, ma susun ndab mu pag talin ni pi namba ney e be yip’ fan e pi girdi’ ni kar micheged e michan’ rorad. Mu lemnag reb. Guillermo e ilal u Bolivia. Kan gargeleg ko duw ni 1935, ma i maruwel ko gin ni yima yung e coca riy ni ka nap’an e ngiyal’ ni mereb e duw rok. Ka nap’an ni kab bitir, ni i yengyeng yuwan e coca ni fan e nge ayuweg e dowef rok ko maruwel nib elmerin. Munmun, me un ko chingaw nge mathow tamagow. Machane nap’an ni fil e n’en nib t’uf ni nge rin’ ku Jehovah, me pag Guillermo e tamagow nge chingaw. Bin ba ga’ e skeng ni yib ngak e nap’an ni nge pag i yengyeng yuwan e coca ni ban’en ni ke mecham ngay ni ka nap’an nib bitir. Ke meybil ni gubin ngiyal’ ma aram me gel ko re magawon nem. Ke pag e pi n’em ni ke mecham ngay, ma ma aram me un ko taufe. Ke yog ni gaar: “Chiney, e kug thamiy rog ni kug beech ma kari felfelan’ug.”

5. Mang e gad ba adag ni ngad rin’ed?

⁵ Ri ba adag Jehovah ni nge ayuweg e girdi’. Ma ba adag ni nge gubin e girdi’ mar kalgadngan’rad ko kireb rorad. (2 Pet. 3:9) Ku ireram e n’en ni gad baadag ni ngad rin’ed. Ere ngad paged ni nge mithimthegdad gum’irchadad ngad rin’ed urngin nrayog rodad ngad ayuweged e piin nib yul’yul’ ngar nanged Jehovah mar boded gadad nib t’uf Jehovah rodad.