Deer
◼ Ba puluw ni nge un reb e Pi Mich Rok Jehovah ko tafalay u reb e aspital ara ngan ayuweg u reb e nursing home ara yungi n’en ni yima ayuweg e pilibthir riy nib milfan nga tan pa’ baraba’ e teliw, fa?
Boor yurba’ e teliw ni bay e aspital rorad ni yima tafalaynag e m’ar riy nge nursing home. Baga’ ni pi yungi n’ey e gathi kan ngongliy ni fan e nge mon’ognag e machib ko fare Babylon nib Gilbuguwan. (Rev. 18:2, 4) Sana kan ngongliy ni fan e nge yognag e salpiy nga baraba’ e teliw. Ngiyal’ ney e boor e aspital ni kemus ni yigoo fithingan e bay rogon ko teliw, ma boch e yu yang riy e ma maruwel e pi tayugang ko teliw riy.
Faanra ba t’uf ni ngan tafalaynag reb e Pi Mich Rok Jehovah u aspital ara ngan ayuweg ko nursing home, ma ir rok e ra turguy ko nge yan nga reb e aspital ara nursing home nib milfan nga baraba’ e teliw fa danga’. Sana be’ e ra pag e nangan’ rok ni nge rin’, ma be’ e danga’. (1 Tim. 1:5) Bay boch ban’en nra rin’ ban’en nga rogon nra dugliy be’ ban’en, mab fel’ ni ngan fal’eg i lemnag e pi n’ey.
Bod nrayog ni fare aspital ara nursing home ni bay rogon fithingan nga baraba’ e teliw e kari mus e re aspital ara nursing home ko gin ni ga ma par riy. Ara faanra bay yugu reb e aspital ara nursing home, machane fabinem ni bay rogon fithingan nga baraba’ e teliw e kab fel’ e tafalay riy. Ma fare aspital ni aram rogon e sana kemus ere aspital ni bay e masin riy nge talin e maruwel nrayog ni nge fanay e pi togta ko re miti tafalay nib t’uf ni ngan tay ngom, ara kemus ere aspital ni bay e togta riy nrayog ni nge tafalaynigem. Maku, yu ngiyal’ ma pi aspital ney nib milfan nga baraba’ e teliw e yad ra tayfan e lem rom u murung’agen e racha’ ni gur reb e Kristiano nib thil rogon nga yugu boch e aspital. Ere ereray boch ban’en nthingar mu lemnag u nap’an ni ngam turguy ere aspital ni ngam man ngay ko taflay.
Faanra kam turguy ni ngam man nga reb e aspital ara nursing home ni bay rogon ara ba milfan nga baraba’ e teliw, ma rayog ni ngam lemnag ni kemus ni gabe pi’ puluwon be’ nrayog ni nge tafalaynag e m’ar rom. Rayog ni ngam sap ngay nib siyobay, ma gara chuw’iy bmit e falay ko re siyobay ney ma gathi ga be pi’ e ayuw nga baraba’ e teliw ni googsur. Ya kemus ni ga be pi’ puluwon e tafalay ara maruwel ni kan rin’.
Riyul’, ni bochan e gur reb e Kristiano, ma thingar mu guy rogon ndab mu un nga bmit e liyor ni googsur. Maku, dab mu pining e pi liw ni ma fanay e pi yurba’ i teliw, ni bod e “Padre” ara “Sibester,” ngak e girdi’ ni ma maruwel u lan e aspital. (Matt. 23:9) Thingar mu guy rogon ngeni par fare n’em nib siyobay ni yibe pi’ e ayuw riy ngom ni bay mu pi’ puluwon, ma kemus aram.
Nap’an ni ka non’em nga aspital, mag tamilangnag ngorad ni gur reb e Pi Mich Rok Jehovah ma ga ba adag ni nga iyib e piin ni piilal ngaur guyed gur. Ya re n’ey e ra ayuwegem nge yog nni pi’ e ayuw ngom ko tirok Got ban’en u nap’an ni ga bay u rom.—1 Thess. 5:14.
Faanra bay reb e walag nib pillibthir u reb e nursing home nib milfan nga baraba’ e teliw, ma girdien e tabinaw rok ni yad boch e Pi Mich, nge piin ni piilal ko ulung, nge girdi’ u lan e ulung e susun ni ngar pied e ayuw ngak ko tirok Got ban’en. Yira tiyan’uy ko re n’ey ma ra ayuweg facha’ ni nge dabi oloboch nge un ko misa, ara pi madenom ni yima tay ko yungi n’ey.
Gad gubin nra bagadad ma thingari lemnag e pi n’ey nge tin nib l’ag ngay ban’en u m’on ni nge dugliy e re aspital ni nge yan ngay ko taflay ara nursing home ni ngan ayuweg riy.—Gal. 6:5.