Nge M’agan’um Ngay ni Ngam Thilyeg e Lem Rom

Piin ni yad baadag ni nge yog e tamilangan’ ko thin riyul’ ngorad e thingari m’agan’rad ngay ni ngar ‘feked urngin e lem ni bod ni yima kol e girdi’ ko mahl ngar pingeged nge fol rok Kristus.’ (2 Korinth 10:5) Gathi gubin ngiyal’ nib mom e re n’ey, nib ga’ ni faanra rib mich reb e machib u wan’rad. Bod nu m’on ni kam fil e tin riyul’, ma ga ma un nga boch e madnom ni ma tay e pi yurba’ i teliw. Machane, tomuren ni kam fil e Bible ma ke tamilang u wan’um ni pi madnom nem e ke sum rok boch e girdi’ ni yad ma meybil nga boch e got ni googsur. Som’on e dabum ni ngam fol ko n’en ni kam fil. Machane faani munmun, ma ayuwegem e t’ufeg rom ngak Got rom ni ngam tal ndab kum un ko pi madnom nem. Gathi ke tow’athnagem Got ko n’en ni kam dugliy?​—Mu taarebnag ko Hebrews 11:25.

Faan gad ra rin’ ban’en nrogon nib m’agan’ Got ngay ma gubin ngiyal’ ni ma yib angin ngodad. (Isaiah 48:17, 18) Ere, faanra ke tamilang fan reb e thin nu Bible u wan’dad, ma ngad felfelan’gad! Thin riyul’ ni be tamilang u wan’dad e be dag ni gad be yan u daken e pa’ nib fel’ e kanawo’. “Fare pa’ i kanawo’ ni ma yan e girdi’ nib mat’aw u daken e bod e yal’ ni nge m’ug, ni be ga’ raen i yan nge mada’ ko ngiyal’ ni kari rran.”​—Proverbs 4:18.