Ngan Par nib Mudugil ko “Tin Riyul’”

1. Mang angin ni be yib ngak e piin ni ma fil fare ke babyor ni Mang e Ri Be Fil e Bible?

¹ Ri gad ba felfelan’ ni fare babyor ni Mang e Ri Be Fil e Bible? e bay u 200 mit e thin nib muun ngay e pi thin nu Micronesia! Re talin e maruwel ney e be ayuweg e pi Bible study ni ngar nanged fan e thin riyul’ mar chugurgad ngak Jehovah.​—Jas. 4:8.

2. (a) Mang magawon e gad ma mada’nag u nap’an ni gad be fanay e pi Bible ni ke piliyeg e pi Kristiano ni googsur? (b) Mang e ra ayuwegdad e re article ney riy ni ngad nanged fan?

² Machane boor ken e Bible ni piliyeg e piin Kristiano ni googsur e thin riy ni ma weliy boch e thin ni de puluw ko n’en ni ri be fil e Bible, ya yad ma piliyeg e thin riy nge m’ag ko machib rorad ni be darifannag Got, ni bod fare machib ko trinitas nge yaal. Re article ney e ra ayuwegdad ngad nanged ko mang fan ni yibe thilyeg boch e thin ko pi babyor rodad nge puluw ko thin nriyul’ u Bible.

3. (a) Mang boch e thin nde puluw ni bay ko ken nu Waab e Bible, ma mang fan nde puluw e pi n’ey? (b) Uw rogon ni gad ma piliyeg e pi babyor rodad?

³ Bod ni, boor e teliw ni yad ma yog ni fare “Kan ni Thothup” e ku reb e got ni bod fare Chitamangiy nge Fak. Ere fare Bible nu Waab e kan piliyeg riy fare bugithin ni “gelngin Got nib thothup” ni “Kan ni Thothup.” Machane re bugithin ney e be yip’ fan reb e kan. Bochan e re n’ey ma nap’an ni gad ra fil e thin riyul’ ngak e girdi’ ma thingar da weliyed ni fare bugithin ni “Kan ni thothup” e de puluw ya ken som’on e Bible nni yoloy e “gelngin Got nib thothup” e bay riy. Ere fare babyor ni Mang e Ri Be Fil e Bible nge yugu boch e babyor e ra fanay fare thin ni “gelngin Got nib thothup” ni nge ayuweg e girdi’ ni ngar nanged fan e thin riyul’.

4. Fare bugithin ni “kan” ni bay u reb e thin ko Bible nu Waab e mang fan nde puluw?

⁴ Ku reb e magawon e faanra ku bay boch e thin nu Bible ni kan pilyeg ni “kan.” Bod rogon fare thin ni bay ko Efesus 2:2. Fare bugithin ni “kan nu lan e lang” e kan fanay ni nge yip’ fan fare gelngin ni be gagiyegnag e piin ndarur pigpiggad ngak Jehovah Got. Ma re n’ey e ma k’aringrad ni nga rogned ara ra rin’ed boch ban’en nde m’agan’ Jehovah ngay. Rogon ni kan pilyeg e re thin ney e de puluw, ere dab kun fanay.

5. Mang fan nib t’uf ni ngan thiliyeg e pi n’ey?

⁵ Fare tapigpig nib yul’yul’ mab gonop e yad “girdien e tin riyul’” ni bod Jesus. (John 18:37) Ere yad ma lemnag e pi magawon ko piin ni ma piliyeg e thin ko pi babyor rodad ma yad ma guy rogon ni ngan piliyeg e thin riy nge puluw ko thin nu Bible. Ri gad ba flaab ya kan pi’ ngodad e ‘pi talin e maruwel’ ni bod fare babyor ni Mang e Ri Be Fil e Bible ni nge tamilangnag e machib “nde riyul’” ni fan e nge urngin mit e girdi’ mar nanged e “tin nib riyul’.”​—1 Tim. 2:4; 2 Kor. 10:4, 5.