“Nge Gal Raamed”
1. Mang e bay rodad ni ngad wereged?
1 Kakadabul nge mada’ ko ngiyal’ nra aw e yal’ ma tamilang nib fel’ yaan e ma pining e sorok ku Jehovah Got. Machane ka bay reb e tamilang ni ke yog Jesus ngak pi gachalpen ni ngar leked ni aram —“fare tamilang ko yafos.” (John 8:12) Gad ba tow’ath ya bay e re tamilang ney rodad mab mil fan boch ban’en ngodad. I gaar Jesus: “Nge gal raamed u p’eowchen e girdi’,” ma ra yib angin ngak yugu boch e girdi’. (Matt. 5:16) Girdi’ e ngiyal’ ney e yad bay u fithik’ e lumor ko tirok Got ban’en, ere thingar da wereged e tamilang ko fare thin rok Got, ma rib t’uf ni ngan rin’ e re n’ey e ngiyal’ ney! Uw rogon nrayog ni nge gal raadad ni bod Kristus?
2. Uw rogon ni dag Jesus feni ga’ fan ni ngan wereg e tamilang ko tirok Got ban’en?
2 Ngan Machib: I fanay Jesus e tayim rok nge gelngin nge tirok ban’en ni fan ni nge wereg e tamilang ko tin nriyul’ ngak e girdi’ u tabinaw rorad, nge yungi n’en ni boor e girdi’ riy, ngu daken e burey—nge gubin yang ni be pirieg e girdi’ riy. Ya manang ni fare tamilang ko tirok Got ban’en e ra ayuweg e girdi’ ndariy n’umngin nap’an. (John 12:46) I ayuweg Jesus pi gachalpen ni ngar boded e “tamilang ngak e girdi’ nu fayleng ni polo’” ni fan e ngar ayuweged e girdi’ ni boor. (Matt. 5:14) Ere ke gal raarad u daken e ngongol rorad nib fel’ ngak e piin migid ngorad, maku bochan e yad ma wereg e thin riyul’.
3. Uw rogon nrayog ni ngad daged nib ga’ fan e tamilang ko tin nriyul’ u wan’dad?
3 Pi tapigpig rok Got e ri yad ma athamgil ni ngar “ngongolgad ni bod rogon e girdi’ nib mil suwrad ko tamilang” ma yad ma machib u gubin yang ko yungi n’en ni bay e girdi’ riy. (Efesus 5:8) Ere faanra un beeg e Bible ara yugu boch e babyor rodad u taban e maruwel ara u skul ma rayog ni nge mab e kanawo’ ngodad ni ngad machibnaged boch e girdi’. Aram e n’en ni rin’ reb e rugod me yog ni nge tababnag e fol Bible ngak boch e girdi’ me wereg e babyor ngak 12 e bitir ni yad nga skul!
4. Mang fan nrayog ni nge ‘gal raadad’ u daken e ngongol rodad nib fel’?
4 Ngan Ngongliy e Ngongol nib Fel’: Maku ra gal raadad u daken e ngongol rodad. (Efesus 5:9) Ra gal ramaen e ngongol ko Kristiano u taban e maruwel ngu skul nge yu ngi n’en ni boor e girdi’ riy, ma rayog ni nge mab e kanawo’ ni ngan weliy e thin nriyul’ u Bible. (1 Pet. 2:12) Bod reb e pagal ni lal e duw rok ni bochan e ngongol nib fel’ ni rin’ ma aram e n’en ni k’aring e sensey rok ni nge pining e gallibthir rok me yog ngorow ni gaar: “Dariy yugu reb e bitir ni gu manang ni bod e re tir romew ney nrib fel’ e ngongol rok!” Arrogon, machib ni gad ma tay nge ngongol rodad nib fel’ e ma k’aring e girdi’ ngar bad ko “tamilang ko yafos,” min pining e sorok ngak Got.