Ba T’uf ni Ngaud Gum’an’gad u Nap’an e Machib
1. Uw rogon ni be gum’an’ Jehovah u puluwon urngin e girdi’?
1 Be gum’an’nag Got ir u puluwon urngin e girdi’. (Ex. 34:6; Ps. 106:41-45; 2 Pet. 3:9) Be m’ug e re n’ey u rogon e machib ni yibe tay u ga’ngin yang e fayleng. Ke chugur ni nge gaman 2,000 e duw ni be maruwel Jehovah nge boch e girdi’ u taabang, machane ka be ulul i ayuweg e girdi’ ni nge fel’ e tha’ u thilrad. (John 6:44) Ere, uw rogon ni nge m’ug ko machib ni gad ma tay ni ka be gum’an’ Jehovah u puluwon e girdi’?
2. Uw rogon ni ngaud gum’an’gad u nap’an ni gad be machib ko pi binaw ni gad ma machib riy?
2 Machib u Mit e Tabinaw: Faan gad ra ‘ulul’ ngaud machibgad ko pi binaw nde adag e girdi’ e machib riy ma aram e gad be folwok rok Jehovah. (Acts 5:42) Ku gad ma gum’an’ u puluwon e piin ni yad ma darifannag e machib rodad, nge piin ni yad ma moningnagdad, nge piin ni yad ma togopuluw ngodad. (Mark 13:12, 13) Ku ma m’ug ni gad ba gum’an’ ni bochan e gad ma sul ko girdi’ ni yad baadag e machib ni yugu aram rogon nib mo’maw’ ni ngan piriegrad yu ngiyal’.
3. Mang fan nib t’uf e gum’an’ u nap’an ni gad be sul ko girdi’ ni kad mada’naged u nap’an e machib ngu nap’an ni gad be fil e Bible ngorad?
3 Piin ni Gad Ma Fil e Bible Ngorad: Gad ra yung reb e woldug mab t’uf ni ngad gum’an’gad. (Jas. 5:7) Riyul’ nrayog ni ngad ayuweged fare woldug machane dabiyog ni ngad gagiyegniged rogon ni be ilal. (Mark 4:28) Taareb rogon ko ngan ilal ko tirok Got ban’en ni ma buch ni buchuuw ma buchuuw. Piin gad ma fil e Bible ngorad e rayog ni nge mo’maw’ ngorad ni ngar digeyed boch e machib nde riyul’ ni ke mich u wan’rad ara boch ban’en ni yad ma rin’ nde puluw ko Bible. Yugu aram rogon, ma susun e dab da towasariyed yad ni ngar thilyeged e ngongol rorad ya nge yog nra m’onoggad ko tirok Got ban’en. Ba t’uf e gum’an’ ya nge yog ni nge maruwel gelngin Got nib thothup nge thilyeg rarogon faen ni gad be fil e Bible ngak.—1 Kor. 3:6, 7.
4. Uw rogon nra ayuwegdad e gum’an’ nge yog nda ayuweged e girdi’ rodad ngar nanged e tin riyul’?
4 Girdi’ Rodad Nde Mich e Thin Rok Got u Wan’rad: Yugu aram rogon ni gad baadag ni nge nang e girdi’ rodad e tin riyul’, machane gad ma gum’an’ ngad sonnaged e ngiyal’ nib fel’ ni ngad weliyed ngorad e tin ni ke michan’dad ngay, maku gad ma guy rogon ni nge dabi pag urngin ban’en ni ngad weliyed ngorad. (Ekl. 3:1, 7) Ngongol rodad e ra m’ug riy rarogodad ni bochan e tin riyul’ ni kad filed, ma gubin ngiyal’ ni kad fal’eged rogodad kad pared nrayog ni ngad weliyed e tin ni ke michan’dad ngay u fithik’ e sumunguy nge tayfan. (1 Pet. 3:1, 15) Riyul’ ni faan gad ra machib u fithik’ e gum’an’ ma ra yib angin ma ra felfelan’nag e Chitamangidad ni bay u tharmiy.