Piin Fel’ Yangaren, Mu Gelnaged e Michan’ Romed ni Fan ko Gabul nge Langlath
1. Mang fan nib t’uf ni nge athamgil e piin fel’ yangaren ni nge gel e michan’ rorad?
1 Mang e n’en th’abi ga’ fan u wan’um? Mang e n’en ni ga be lemnag? Goo tin chiney e ga be lemnag fa ka ga be lemnag e pi n’en ni ke micheg Got ni fan ko gabul nge langlath? (Matt. 6:24, 31-33; Luke 8:14) Faanra ngan ngongol nib puluw ko pi n’en ni ke micheg Jehovah, ma ba t’uf e michan’ nib gel ni bod rogon e n’en ni rin’ Abraham nge Moses. (Heb. 11:8-10, 24-26) Uw rogon ni nge gel e michan’ rom me yog e ‘def nib gel ni fan ngom e chiney i yan ngaram’?—1 Tim. 6:19.
2. Mang e gad ra fil ko n’en ni rin’ Josiah ni Pilung?
2 Mu Gay Jehovah: Faanra bay boch ban’en ni gimed ma rin’ chon e tabinaw rom ni fan ko tirok Got ban’en, ma ba fel’. Machane dab mu lemnag ni kemus e n’en nrayog ni nge gelnag e michan’ rom. Ya thingar mu fal’eg i gay Jehovah, ya nge yog ni ngam “nang murung’agen.” (Prov. 2:3-5; 1 Kron. 28:9) Aram e n’en ni rin’ Josiah ni Pilung. Yugu aram rogon ni i par u fithik’ e girdi’ nder ma fol ko thin rok Got me “tabab i liyor ngak e Got rok e ga’ rok ni aram David ni Pilung” u nap’an ni ke gaman 15 e duw rok.—2 Kron. 34:3, BT.
3. Uw rogon ni nge gay e piin fel’ yangaren Jehovah e ngiyal’ ney?
3 Uw rogon ni ngam gay Jehovah? Mu fal’eg i fil e tin ni ke michan’um ngay ya nge yog ni ngar mu ‘nang’ ni ireram e tin riyul’. (Rom. 12:2) Rayog ni ngam weliy e n’en ni be yog e Bible u murung’agen e racha’ ara ngam micheg ni riyul’ ni ke tabab Gil’ilungun Got ko gagiyeg u tharmiy ko duw ni 1914, fa? Ba ga’ fan ni ngam nang e “tin nib riyul’” ya nge yog ni nge gel e michan’ rom ni fan ko gabul nge langlath.—1 Tim. 2:3, 4.
4. Uw rogon ni nge m’ug ni ke mon’og e pi publisher ndawor ra uned ko taufe ko tirok Got ban’en?
4 N’en ni rin’ Josiah e yib angin ngak. U m’on ni nge gaman 20 e duw rok ma de rus ni nge gothey e pi liyos ni yibe liyor ngay. (2 Kron. 34:3-7) Ku rayog ni nge m’ug ko ngongol rom ni kam mon’og ko tirok Got ban’en. (1 Tim. 4:15) Faanra gur reb e publisher ndawor mu un ko taufe, ma ngam athamgil ni ngam salap ko machib. Dab mu lemnag ni faanra kemus ni ga ma pi’ e babyor ngak e girdi’ u nap’an e machib, ma aram e ke gaman e tin nib t’uf ni ngam rin’. Ngam nameg ni ngaum beeg e Bible u nap’an ni ga be weliy e thin rok Got ngak e girdi’, ma ngam guy rogon ni ngam ayuweg e girdi’ ni ngar adaged e machib. (Rom. 12:7) Ireray e n’en nra ayuwegem ngam mon’og ko tirok Got ban’en me gel e michan’ rom ni fan ko gabul nge langlath.