Be Skulnagdad Jehovah ko Re Maruwel Ney
1. Nap’an nra pi’ Jehovah reb e maruwel ni nge rin’ be’, ma mang e ku ma rin’?
1 Nap’an nra pi’ Jehovah reb e maruwel ngak e girdi’, maku ma ayuwegrad u rogon ni ngar rin’ed. Bod nnap’an ni yog Jehovah ngak Noah ni nge toy fare arke, ni ban’en ndawori rin’ bayay, miki yog ngak rogon ni nge rin’. (Gen. 6:14-16) Nap’an ni yog Jehovah ngak Moses ni nge non ngak e pi pumoon ni piilal u Israel nge Farao, me micheg ngak ni gaar: “Bay gu ayuwegnem ngam welthin, ma bay gog ngom e n’en ni nga mog.” (Ex. 4:12) Maku er rogon fare maruwel ni machib ni gad ma tay ni ma yog Jehovah ngodad rogon ni ngad rin’ed. Ma skulnagdad ko re maruwel ney u daken fare Theocratic Ministry Skul nge Service Meeting. Uw rogon ni nge yib angin e re n’ey ngodad?
2. Uw rogon ni nge yib angin fare Theocratic Ministry Skul ngodad?
2 Fare Theocratic Ministry Skul: U m’on ko muulung ma ga fil e pi n’en ni yira weliy. Ma nap’an ni ga be guy rogon ni be fanay be’ e pi n’ey u nap’an e welthin rok, ma aram e rayog ni ngam mon’og u rogon ni ga be fil ban’en ko girdi’. (Prov. 27:17) Machane bin th’abi fel’ e kanawo’ ni nge yib angin e re skul ney ngom e ngam un ko pi n’en ni yibe rin’ riy. Ere kam un ngay fa dawor? Faanra bay e welthin rom, ma ga fal’eg rogom u m’on riy ma ga fol ko pi fonow ni yira pi’ ngom. Ma ga fanay e pi n’en ni kam fil riy u nap’an e machib.
3. Uw rogon ni nge yib angin fare Service Meeting ngodad?
3 Fare Service Meeting: Faan gad ra beeg e pi n’en ni yira weliy u nap’an e re muulung ney ma gad fal’eg rogon e fulweg ni ngad pied, ma aram e rayog ni nge dab da paged talin e pi n’en ni kan weliy. Ma faan ku gad ra pi’ e fulweg nib ngoch, ma aram e rayog ni nge yoor e girdi’ ni nge pi’ e fulweg. Mu fal’eg e motoyil ko pi demonstration ni yima pi’, ma ga fol u boch ban’en ni kan weliy riy nra mon’ognag rogon e machib ni ga be tay. Mu chaariy boch e article ko fare babyor ni Machib ko Gil’ilungun nrayog ni ngam fanay u nap’an e machib.
4. Mang fan ni ngad maruwelgad ko pi n’en ni ke pi’ Jehovah ngodad nib fel’ rogon?
4 Fare maruwel ni ngan machibnag fare thin nib fel’ u ga’ngin yang e fayleng e ba mo’maw’ ni bod rogon fare maruwel nni pi’ ngak Noah nge Moses. (Matt. 24:14) Machane faan gad ra taga’ ngak Jehovah ni ir e Sensey rodad Nth’abi Ga’ ma gad fol ko pi n’en ni be fil ngodad ma aram e rayog ni ngad rin’ed e re maruwel ney nib fel’ rogon.—Isa. 30:20.