Mu Lemnag ara Mu Rin’ Ban’en ni Ga Be Fol ko Pi Kenggin e Motochiyel
1. Mang e pi kenggin e motochiyel?
1 Mang e pi kenggin e motochiyel? Ireray e “def ko tin riyul’.” Uw rogon nib thil e pi kenggin e motochiyel ko pi motochiyel? Pi motochiyel e kan fek ko pi kenggin e motochiyel.
2. (a) Mang fan ni kab mo’maw’ boch ni ngan fol ko pi kenggin e motochiyel ko bin ni ngan fol ko motochiyel? (b) Mang fan ni thingar da athamgilgad ni ngad nanged fan e pi kenggin e motochiyel ko bin ni ngad gayed boch e motochiyel?
2 Boor yay ni be pi’ e “thin rok Got” e athamgil nga lanin’dad ni ngad lemnaged ara da rin’ed ban’en ni gad be fol ko pi kenggin e motochiyel. Mo’maw’ ni ngan nang fan min fol ko pi kenggin e motochiyel u Bible, ma kab mom ni ngan fol ko motochiyel. Bochan ndawor da flontgad ma sana dubdad ni ngad athamgilgad ni ngad nanged fan e pi kenggin e motochiyel. Ma sana gad baadag ni ngad folgad u boch e motochiyel u nap’an ni ngad turguyed ban’en ara u nap’an ni ke yib e magawon ngodad. Yu ngiyal’, ma sana ngad ninged e ayuw ngak reb e walag ni ke ilal ko tirok Got ni bod e piilal u lan e ulung ya gad baadag ni ir e ra yog ngodad ko mang motochiyel e ngad folgad riy. Machane, gathi gubin ngiyal’ nrayog ni ngad pirieged e motochiyel nu Bible ara u lan boch e babyor u lan e ulung rodad. Faanra ba’, machane, dabiyog ni ngan fanay e re n’ey ni fan nga reb e magawon u gubin ngiyal’.
3. (a) Mang fan nrayog ni ngad dogned ni ke fol Josef ko kenggin e motochiyel ma gathi motochiyel? (b) Uw rogon ni ngad folwokgad rok Josef?
3 Mu lemnag fan nde fol Josef u nap’an ni ke waliy leengin Potifar ni ngar parew. Yugu aram rogon ni dawori pi’ Jehovah e motochiyel u murung’agen be’ ni kar parew be’ ni gathi mabgol rok maku dariy e motochiyel ni be yog ko mang e gechig ni ngan pi’ ngak be’ ni ke un ko re ngongol ney, machane, manang Josef fare kenggin e motochiyel ni aram e baadag Got ni nge par be’ nib yul’yul’ ngak e ani mabgol rok. (Genesis 2:24; 12:18-20) Rayog ni ngad guyed ko thin ni ke yog ni riyul’ nrib ga’ fan u wan’ e re kenggin e motochiyel nem ya gaar: “Ere uw rogon ni nggu ngongliy e binir e ngongol nib kireb ni aram e kug denen nib togopluw ngak Got?”—Genesis 39:9.
4. Gad ra fol ko pi kenggin e motochiyel, ma uw rogon ni nge ayuwegdad ni dab da uned ko liyor nib m’ay fan ni kaygi yoor e motochiyel nib t’uf ni ngan fol riy?
4 Faanra kad nanged e pi kenggin e motochiyel ma gad be fol riy, ma rayog ni ngad siyeged e liyor nib m’ay fan ni kaygi yoor e motochiyel nib t’uf ni ngan fol riy. Bay ban’en nib thil ko ngan fol ko pi kenggin e motochiyel nu Bible ko bin ni ngan fol u boor e motochiyel. Gad ra fol ko pi kenggin e motochiyel nu Bible ma rayog ni nge dab da folgad (ma dab dogned ngak boch e girdi’ ni ngar folgad) u boor e motochiyel ndariy u Bible. Maku rayog ni nge ayuwegdad e re n’ey ni nge t’uf Got rodad ma ngad folgad rok ma gathi kemus ni gad be rin’ ban’en ni nge pining e girdi’ e sorok ngodad.—Luke 11:42.