Deer

◼ Mang e thingar dab da paged talin nfaanra gad baadag ni boch ara urngin e chugum nge binaw rodad e ngad pied ko ulung rok Jehovah u tomuren ni kad m’ad?

Nap’an nra yim’ be’ ma dabkiyog ni nge ayuweg e chugum rok. (Ekl. 9:5, 6) Ere boor e girdi’ ni kar fal’eged e babyor ni be weliy ko uw rogon ni ngan wereg e chugum rok nge chon mini’ e ngan pi’ e binaw rok ngorad. (2 Ki. 20:1) Maku ngan yoloy ko re gi babyor ney ko mini’ e en ni kan pi’ mat’awun ni nge ayuweg e chugum rok be’ u nap’an nra yim’. U boch e nam, e faanra dariy e babyor ni kan fal’eg, ma girdien e am e ra dugliy ko mang e ngan rin’ ko chugum ara binaw rok e cha’ nem ni ke yim’. Aram fan, nfaanra gad baadag ni ngad pied urngin e chugum rodad nge binaw rodad ara bang riy ko ulung rok Jehovah, mab ga’ fan ni ngad fal’eged e babyor ni be weliy murung’agen. Ma ngad mel’eged nib fel’ rogon e cha’ ni ir e ngad pied mat’awun ni nge ayuweg ya nge yag ni ngan fol ko n’en ni be yog fagi babyor u tomuren ni kad m’ad.

Ba gel e maruwel ni ke mil fan ngak faen ni kan pi’ mat’awun ni ir e ra ayuweg ya nge yag ni ngan fol ko n’en ni be yog fare babyor u tomuren ni ke yim’ be’. Ba t’uf ni nge fanay boor e tayim rok ya boor ban’en nib t’uf ni nge rin’ nge yag ni nge f’oth e chugum nge binaw rok be’ ni ke yim’. Maku ba ga’ ni bay e babyor ni ke fal’eg e am u murung’agen e re n’ey nib t’uf ni ngan fol riy. Ere gathi urngin e girdi’ u lan e ulung e bay rogorad ni ngar uned ko re maruwel ney. Cha’ ni gad ra mel’eg e susun ni ir be’ nib salap, ma yima pagan’uy ngak, ma riyul’ ni baadag ni nge lebug e n’en ni kan yoloy ko fa gi babyor.

Faanra Kan Fithem ko Ga Baadag ni Gur e Ngan Pi’ Mat’awum ni Ngam Ayuweg Nge Lebug e N’en ni Be Yog fare Babyor: Faanra kan fithem ko ga baadag ni gur e ngam ayuweg ni nge lebug e n’en ni be yog fare babyor, mab t’uf ni ngam lemnag nib fel’ rogon ko rayog ni ngam rin’ e re maruwel ney, fa danga’. (Luke 14:28-32) Tomuren ni ke yim’ facha’, mab t’uf ni ngam non ngak urngin e girdi’ ni kan pi’ mat’awrad ni nge yag reb e f’oth ngorad. Ma ke mil fan ngom ni ngam pi’ e f’oth rorad ngorad nrogon nib puluw ko motochiyel nge n’en ni be yog fare babyor ni kan fal’eg. Dab mu pagtalin ni demtrug ko boor e chugum rok e cha’ nem fa buchuuw, mab t’uf ni ngan fol ko n’en ni be yog fare babyor. Urngin ban’en ni kan pi’ ko ulung rok Jehovah ni tow’ath e susun re ulung ney e ke mil fan ngak.​—Luke 16:10; 21:1-4.