I “Machibnag” e Girdi’ nib Fel’ Rogon
1. Uw rogon e machib ni i tay apostal Paul nib fel’ ni ngan folwok riy?
1 ‘Mu ngongliy urngin e maruwel ni kan pi’ ngom nrogon e tapigpig rok Got.’ (2 Tim. 4:5) Ba mudugil nde tun tun apostal Paul ni pi’ e re fonow ney ngak Timothy. Bin riyul’ riy e u thilin e duw ni 47 nge 56 C.E., me mu’nag Paul dalip e milekag ni i tay ni be machib. Fare babyor ni Acts e boor yay ni ke weliy murung’agen Paul ni be “machibnag” e girdi’ nib fel’ rogon. (Acts 23:11; 28:23) Uw rogon ni ngad rin’ed e re n’ey ko ngiyal’ ney?
2. Uw rogon ni ngad machibgad nib fel’ rogon u nap’an ni gad be machib u mit e tabinaw?
2 Machib u Mit e Tabinaw: Gad be athamgil ni ngad machibnaged boch e girdi’ ndawor rung’aged fare thin nib fel’, ere faanra ka darod nga tafen be’ ma da ni moy, ma sana ba fel’ ni nga darod e ngaram u yugu reb e tayim. En lolugen e tabinaw e sana ra moy u tabinaw ko blayal’ ara Sabado nge Madnom. Susun e ngad guyed rogon ni ngad nonad ngak be’ ko pi tabinaw ni ka darod ngay, mu ud sulod ko pi tabinaw ndariy e girdi’ riy. Machane, uw rogon ni faanra der yog ni ngam mada’nag be’ ko pi tabinaw ney? Ra aram rogon ma sana ba fel’ ni ngam yoloy e babyor ngorad ara mu callnagrad u telefon.
3. Mang boch e kanawo’ nrayog ni ngam machib riy u fithik’ e yoor ara fithik’ e sabethin?
3 Machib u Fithik’ e Yoor ngu Fithik’ e Sabethin: Pi tapigpig rok Jehovah e ngiyal’ ney e yad ma machibnag murung’agen e bin riyul’ e “gonop” ngak urngin e piin ni yad ra motoyil ngay. Yu ngiyal’ e yad ma rin’ e re n’ey u “kanawo’” ara “yungi n’en ni bay e market riy.” (Prov. 1:20, 21) Gad ma guy rogon ni ngad machibgad u nap’an ni gad be rin’ e pi n’en ni gad ma rin’ u reb e rran ngu reb, fa? Rayog ni nga nog ni gad be ‘par ni yigoo thin rok Got e gad be machibnag ko girdi’,’ fa? (Acts 18:5) Faanra aram rogon, ma aram e gad be ‘machibnag’ e girdi’ nib fel’ rogon.—Acts 10:42; 17:17; 20:20, 21, 24.
4. Uw rogon ni meybil nge ngan fal’eg i lemnag ban’en e rayog ni nge ayuwegdad ni ngad machibgad nib fel’ rogon?
4 Machane, yu ngiyal’ e darud machibgad ni bochan boch ban’en ni gad ba meewar riy ara bochan ni gad ba tamra’. Manang Jehovah e pi n’en ndabiyog rodad. (Ps. 103:14) Machane, ra taw ko yu ngiyal’ i n’ey, ma rayog ni ngad meybilgad ngak ngad ninged e ayuw ni nge ayuwegdad ni nge dab da rusgad ni ngad nonad. (Acts 4:29, 31) Maku nap’an ni gad be fil e Bible ni goo gadad ngu nap’an ni gad be fal’eg i lemnag, ma rayog ni nge gel feni ga’ fan fare thin nib fel’ u wan’dad. (Fil. 3:8) Re n’ey e ra k’aringdad ni ngad machibnaged fare thin nib fel’ ni gad ba pasig!
5. Uw rogon nrayog ni ngad uned i lebguy fare yiiy rok Joel?
5 Ke yiiynag Joel nu m’on nra yib fare rran nib ga’ rok Jehovah ma pi tapigpig rok e dab ra paged ban’en ni nge “talegrad” ndab kur machibgad. (Joel 2:2, 7-9) Ere manga yugu da uned i rin’ e re maruwel ney nib fel’ rogon, ya gad manang ndab kun sul u daken biid!