PI N’EN NI MA RIN’ E PIIN KISTIANO
Ngan Fol ko Motochiyel rok Jehovah ni Be Tamilangnag ko Ba Miti Mang Ngongol e Ba Fel’
Jehovah Got e ir e ke ngongliy e motochiyel rok ni be tamilangnag ko ba miti mang ngongol e ba fel’ ni nge rin’ e girdi’. Bod ni bay e motochiyel rok ni be yog nnap’an nra un reb e pumoon nge reb e ppin ko mabgol, ma susun ni ngar parew u taabang u n’umngin nap’an e yafos rorow. (Mt 19:4-6, 9) Ku ma fanenikay gubin mit e ngongol ndarngal. (1Ko 6:9, 10) Ki tay boch e kenggin e motochiyel rok nra gagiyegnag rogon e munmad ni nge tay e pi tapigpig rok nge rogon ni ngar fal’eged yaarad. Ma rogon e munmad ni ma tay e pi tapigpig rok e ba ga’ ni ma mug riy ni yad ba thil ngak yugu boch e girdi’.—De 22:5; 1Ti 2:9, 10.
Boor e girdi’ e ngiyal’ ney ndubrad ni ngar folgad ko pi motochiyel rok Jehovah. (Ro 1:18-32) Ya n’en ni yad ma rin’ e yad ma fol ko n’en nib puluw u wan’ yooren e girdi’ u rogon e munmad ni ngar ted, nge rogon ni ngar fal’eged yaarad, nge miti mang ngongol e ba fel’ ni ngan rin’. Mab ga’ ni yad ma uf ko ngongol nib kireb ni yad ma rin’ ma yad ma gathibthibnag e piin nib thil rogon e ngongol ngorad.—1Pe 4:3, 4.
Gadad e Pi Mich Rok Jehovah e thingar da ted fan e pi motochiyel rok Got ni be tamilangnag ko ba miti mang ngongol e ba fel’. (Ro 12:9) Ni uw rogon? Thingar da gonopiyed rogon ni gad ma dag e tin nib m’agan’ Got ngay. Kub t’uf ni nge m’ug ni gad be fol ko motochiyel rok u lan e yafos rodad. Bod ni, nap’an ni ga ra mel’eg e miti mad ni ngam chuw ngay, ara rogon ni ngam fal’eg yaam, mab t’uf ni ngam fithem ni nge lungum: ‘Gur, re mad ney ni kug mel’eg ni nggu chuw ngay e ba puluw ko n’en nib m’agan’ Jehovah ngay, fa ba puluw u rogon e mad ni ma chuw e girdi’ nu fayleng ngay? Faan gu ra chuw ko re mad ney, ma gur, be m’ug riy ni gag be’ ni bay madgun Got u wan’ug, fa danga’?’ Ara reb e, nap’an ni ga ra mel’eg ko miti mang program ara kachido ni ngam yaliy, ma ngam fithem ni nge lungum: ‘Gur, ra felfelan’ Jehovah ko n’en ni kug mel’eg, fa? Pi n’en nra m’ug yaan ko re kachido ney e mini’ e motochiyel rok e be tay fan? Re n’ey ni kug mel’eg ni nggu yaliy e rayog ni nge mo’maw’nag ngog ni nggu par ni gub yul’yul’ ko pi motochiyel rok Jehovah, fa danga’? (Ps 101:3) Rayog ni nge magawonnag laniyan’ girdien e tabinaw rog ara yugu boch e girdi’, fa?’—1Ko 10:31-33.
Mang nib ga’ fan ni ngad ted fan e pi motochiyel rok Jehovah ni be tamilangnag ko ba miti mang ngongol e ba fel’? Fan nib t’uf ni ngad rin’ed e re n’ey, e bochan ndab ki n’uw nap’an ma ra yib Jesus Kristus ni nge thang gubin e piin kireb ni yad bay u ga’ngin yang e fayleng. (Eze 9:4-7) Ma kemus ni piin ni yad be rin’ e n’en nib m’agan’ Got ngay e yad ra magey ni yad ba fos. (1Jo 2:15-17) Ere, ngad athamgilgad ni ngad folgad ko pi motochiyel rok Jehovah ni gubin ngiyal’, ya nap’an nra guy e girdi’ e ngongol rodad nib fel’, ma yad ra pining e sorok ngak Got.—1Pe 2:11, 12.
NGAN YALIY FARE VIDEO NI KENGGIN E BECOME JEHOVAH’S FRIEND—ONE MAN, ONE WOMAN, NGEMU’ MIN WELIY E FULWEG KO PI DEER NI BAARAY:
Mang angin nra yib ngodad ni faan gad ra fol ko pi motochiyel rok Jehovah?
Mang fan nsusun ni nge fil e piin gallabthir ngak pi fakrad e pi motochiyel rok Jehovah ni be tamilangnag ko ba miti mang ngongol e ba fel’ u nap’an ni ku yad ba bitir?
Uw rogon nrayog ni nge yib angin ngodad e pi n’en ni ma rin’ Got nib manigil ndemtrug ko gadad bbitir ara kad piilalgad?