PI N’EN NI MA RIN’ E PIIN KRISTIANO

Ban’en nib Beech ni Gad Ra Fanay u Nap’an e Muulung ni Gad Ra Tay u Lan e Wik

Nap’an e January ko duw ni 2018, ma gad ra tabab ni ngad fanayed e pi study note nge media ni kan fek ko study edition ko fare ke Bible ni New World Translation of the Holy Scriptures (nwtsty) ni bay u online u nap’an e muulung ni gad ra tay u lan e wik. Rayog ni ngad fanayed e pi n’ey ni yugu aram rogon ndawor ni ngongliy e re Bible ney ko thin rom. Dariy e maruwar riy nra ayuwegem e re n’ey u nap’an ni ga be fal’eg rogom ni fan ko muulung. Ma bin th’abi ga’ fan riy e, re n’ey e ra chugurnag e tha’ u thilmew Jehovah ni ir e Chitamangidad ni gad ba t’uf rok!

PI STUDY NOTE

Pi study note ney e bay boch ban’en riy u murung’agen e yalen u boch e binaw, nge boch ban’en u rarogon reb e binaw nge reb, nge rogon e thin rorad. Ireray boch ban’en nra tamilangnag murung’agen e thin nu Bible ni gad ra fil.

Matthew 12:20

Wick ko magal ni be n’en ni nge math: Kakrom e yima fanay e magal ni kan ngongliy ko but’ ni bay e gapgep ni olive riy. Ere nap’an ni yira tay e wick ni kan ngongliy ko flax ko re magal nem, me ir e ma girngiy fare gapgep me yag ni nge par fare magal ni be af. Fare thin ni “ba magal ni be n’en ni nge math” ni kan fek ko thin nu Greek e rayog ni nge yip’ fan ba wick ni dakir daramram, ma kemus ni be yan e ath riy ni bochan e ka bay achifin. Fare yiiy ni bay ko Isaiah 42:3 e be weliy murung’agen e runguy rok Jesus. Re thin ney e be yip’ fan ndabi thang Jesus e chuw i athap ni bay rok e piin ni yad ba sobut’an’ ni ke mulan’rad.

Matthew 23:36

Riyul’ ni gu be yog ngomed: Re thin ney ni kan pilyeg ni a·menʹ ko thin nu Greek e ku yima yog ni ʼa·menʹ ni thin nu Hebrew e be yip’ fan e “arrogon” ara “rayog ni nge pagan’uy ngay.” Ba ga’ ni ma yog Jesus e re thin ney u m’on ni nge weliy murung’agen ban’en, ara nap’an ni nge micheg ban’en, ara nap’an nra weliy murung’agen reb e yiiy, ya nge micheg nib riyul’ e pi thin nem ni be yog ma rayog ni nge pagan’uy ngay. Re thin nem ni ma yog Jesus ni “riyul’ ni gu be yog ngomed” ara arrogon e yigoo lan e pi babyor nib thothup e bay riy. Ma nap’an ni yira yog e re thin ney ni l’agruw yay (a·menʹ a·menʹ) ni bod rogon ni bay u lan e Gospel rok John, ma yima yog ni “nggog e tin riyul’ ngomew.”—Joh 1:51.

MEDIA

Boch e sasing, nge boch e video ni kemus ni yigoo sasing e be m’ug riy, nge boch e kachido ni kan animatenag ni be dag yaan boch ban’en ni bay u lan e Bible.

Bethphage, the Mount of Olives, and Jerusalem

Re video ney nib ngoch nap’an e be dag yaan ba pa’ i kanawo’ ni tabab ko ngek ko binaw nu et-Tur ni be sor i yan ko Burey nu Olives. Fare binaw nu et-Tur e yibe lemnag ni aram fare binaw nu Bethfage kakrom. Ma fare binaw nu Bethany e bay u sigreen e Burey nu Olives ko ba’ ni ngek ko binaw nu Bethfage. Nap’an ni immoy Jesus nge pi gachalpen u Jerusalem mab ga’ ni yad ma par ko binaw nu Bethany. Re binaw ney e yima yog ni el-ʽAzariyeh (El ʽEizariya) ko thin nu Arab ni be yip’ fan e “Binaw rok Lazarus.” Dariy e maruwar riy ni i par Jesus ko tabinaw rok Martha, nge Maria, nge Lazarus. (Mt 21:17; Mr 11:11; Lu 21:37; Joh 11:1) Nap’an nra milekag Jesus nge pi gachalpen nga Jerusalem, ma sana re kanawo’ ney ni kan dag yaan ko fare video e ireray e re kanawo’ ni ka ranod riy. Ma nap’an ni yib Jesus u daken e donkey ko binaw nu Bethfage ni nge th’ab fare Burey nu Olives ni nge yan nga Jerusalem ko Nisan 9 ko duw ni 33 C.E., ma sana ka taab kanawo’ e yan riy.

Kan Pag e Richib ko Yil u Rifrifen Ay Be’ Ke For Nga Barba’

Ireray reb e sasing ni yaan ba richib ni kan pag ko yil u rifrifen ay be’ ke for nga barba’. Re richib ney e 11.5 cm (4.5 in.) n’umngin. Re yil nem e nni pirieg ko duw ni 1968 u nap’an ni yibe ker e but’ u ba’ ni lel’uch u Jerusalem, ma re n’ey e yibe lemnag ni ban’en ni immoy u nap’an ni be gagiyeg e am nu Roma. Ireray reb e ban’en ni be micheg nnap’an ni yira li’ be’ nge yim’ ma yima richibiy nga baley i gek’iy. Miti richib ney e sana taareb rogon ko richib ni i fanay fapi salthaw nu Roma u nap’an richibiyed Jesus Kristus ko fare ley i gek’iy ni ngan li’ nge yim’. Kan pirieg e re yil ney u lan ba kahol ni kan fal’eg ko malang ni ka nog e ossuary ngay ni yima tay yilen be’ ni ke yim’ ngay. Be’ ni kan tay yilen nga lan e miti kahol ney e m’ug riy nrayog ni ngan k’eyag.—Mt 27:35.