TIN MA RIN’ E PIIN KRISTIANO
Pi Convention ni Gad Ma Tay e Aram e Ngiyal’ Nrayog ni Ngad Daged e T’ufeg Riy
Mang fan nri gad ma felfelan’ ni ngad uned ko pi convention rodad? Bochan ni aram e ngiyal’ ni gad ma liyor bokum biyu’ e pi walagdad ngak Jehovah u taabang ni bod rogon ni i rin’ piyu Israel kakrom. Boor ban’en ni gad ma fil riy ni ma ayuwegdad ni ngad chugurgad ngak Jehovah nri ma k’aring e felfelan’ ngodad. Ku aray e ngiyal’ ni gad ma felfelan’ ni ngad chaggad e pi fager rodad nge girdien e tabinaw rodad u taabang. Bochan nib ga’ fan e pi n’ey u wan’dad, ma aram fan ni gad ma un ko re dalip i rran nem ni gad ma tay e pi convention riy.
Nap’an nra mab e kanawo’ ngodad ni ngad chaggad e pi walag u taabang, ma gathi kemus ni ngad lemnaged e n’en nra yag riy ngodad, ya ngkud lemnaged rogon ni ngad daged e t’ufeg ngak yugu boch e girdi’. (Ga 6:10; Heb 10:24, 25) Nap’an ni gad ra bing e mab ngak reb i walagdad, ara kemus ni yigoo tin gad ra par nga daken e chiya e ir e ngad ted e chugum rodad ngay, ma aram e ra m’ug riy ni ku gad be lemnag yugu boch e girdi’. (Fil 2:3, 4) Nap’an ni gad ra un ko pi convention rodad ma rayog ni ngad mada’naged e girdi’ nrayog ni ngar manged fager rodad. Ere rayog ni ngad ted e tayim ni ngad chaggad yugu boch e girdi’ ndawor da mada’gad bayay u m’on ngu tomuren e muulung, nge nap’an ni kad talgad ko misiw’ ni ngad abichgad. (2Ko 6:13) Rayog ni ngad pirieged boch e fager nrayog ni nge par e tha’ u thildad nib fel’ nib n’uw nap’an! Ma bin th’abi ga’ fan riy e, nap’an nra guy e girdi’ ni gad be dag e bin riyul’ e t’ufeg, ma rayog ni ngar adaged ni ngar uned ngodad ko pigpig ngak Jehovah.—Joh 13:35.
NGAN YALIY FARE VIDEO NI “LOVE NEVER FAILS”! INTERNATIONAL CONVENTIONS, NGEMU’ MIN PI’ E FULWEG KO PI DEER NEY:
Uw rogon ni kan dag e t’ufeg ngak e pi walag ni kar bad u yugu boch e nam ni ngar uned ko pi international convention ni kan tay ko duw ni 2019?
Mang e yugu ba thil u rogon e taareban’ nge t’ufeg ni ma m’ug u thilin e girdi’ rok Jehovah?
Mang boch i rarogon e t’ufeg ni ma m’ug ko piin Kristiano ni ke tamilangnag e pi walag ni girdien fare Ulung ni Ma Pow’iyey?
Uw rogon ni ngam gelnag rogon e t’ufeg ni gad ma dag u nap’an e convention rodad?
Uw rogon ni ke taarebnag e t’ufeg e pi walag u Chiyamen nge South Korea?
Mang e susun ni ngad dugliyed ni ngad rin’ed?