Ga Manang Murung’agen e Re N’ey, Fa?

Mang fan ni ma pi’ piyu Israel ban’en ni nge yan nga lon be’ nib pin ni kan ning ni ngan leay?

KAKROM e nap’an nra m’agan’ e tabinaw rok be’ nib pumoon nge be’ nib pin ni ngar mabgolgow, ma aram e ma pi’ fare pumoon ara tabinaw rok boch ban’en nga tafen fare pin ya nge yag nra mabgolgow. Re n’ey e rayog ni boch e machaf nib tolang puluwon, ara gamanman, ara salpiy. Yu ngiyal’ e ku rayog ni nge maruwel be’ ni bod e n’en ni rin’ Jakob ni m’agan’ ngay ni nge maruwel rok e chitamangin Rachel u lan medlip e duw ya nge yag ni ngar mabgolgow. (Gen. 29:17, 18, 20) Mang fan e biney e yalen?

I yog Carol Meyers ni be’ ni boor ban’en u murung’agen e Bible ni manang ni gaar: “Re n’ey ni yima rin’ e nge yan nga lon e maruwel ni ma rin’ fare pin ni fak fare tabinaw. Re n’ey e ban’en nib ga’ fan ko tabinaw [ni yad ma milay’].” Ku rayog ni yima rin’ e re n’ey ni bochan e ngari fel’ thilin fa gal tabinaw ni keb rogorow u daken fare mabgol. Re n’ey e ku rayog ni nge bing e kanawo’ ko fa gal tabinaw ni ngar ayuwegew yow u nap’an ni ke yib e magawon. Maku reb e, ireray e n’en ni ma micheg ni fare pin e kan m’ag e mabgol rok ma bayi chuw u tan pa’ e chitamangin nge yan i par nga tan pa’ figirngin.

Re n’ey ni yima rin’ e der yip’ fan ni fare pin e bod ba chugum nrayog ni ngan chuw’iy ara ngan pi’ ni chuway’. Be yog fare ke babyor ni Ancient Israel​—Its Life and Institutions ni be gaar: “Re n’ey ni ngan pi’ e salpiy ara ban’en ni taareb rogon ngay nga tafen fare pin ni nge mabgol u Israel e rayog ni ngan lemnag ni kan chuw’iy fare pin. Machane bod nre n’ey ni yima pi’ ko tabinaw ko fare pin e nge yan nga lon ma gathi puluwon.”

Bay boch e nam e ngiyal’ ney ni ku yad ma fol ko re yalen ney. Nap’an nra yog e pi gallabthir ni Kristiano ni ngan pi’ boch ban’en nge yan nga lon fakrad nib pin, ma yad ma guy rogon ni nge guy “urngin e girdi’” ndarur lemnaged boch ban’en nib pag rogon ni aram e daru rogned ni ngan pi’ boch ban’en ngorad ni yu gub pag urngin. (Fil. 4:5; 1 Kor. 10:32, 33) Aray rogon ni yad ra dag ndarur ‘chogownaged’ e salpiy ara yugu boch ban’en. (2 Tim. 3:2) Maku reb e, ra dab ra ninged boch ban’en nib pag urngin ma aram e dab ra k’aringed fare pumoon ni nge yon’ yaran fare m’agpa’ nge taw ko ngiyal’ nrayog ni nge pi’ fapi n’em ni yibe ning, ara lemnag nthingari tal ko pioneer ya nge yag ni un ko maruwel ni nge yognag e salpiy nib t’uf ni nge pi’ ni nge yan nga lon fare pin.

Bay yu yang u fayleng ni bay e motochiyel ko nam riy ni be gagiyegnag rogon ni yima rin’ e re n’ey. Faanra bay e motochiyel ni aray rogon, ma thingari fol e pi gallabthir ni Kristiano riy. Mang fan? Ya be yog e Thin rok Got ni piin Kristiano e “thingar ra folgad ko am” nge pi motochiyel nder togopuluw ko pi motochiyel rok Got.​—Rom. 13:1; Acts 5:29.