Mang E Athap Rodad Ni Fan Ko Piin Ni Kar M’ad Ni Yad Ba T’uf Rodad?

“Faanra yim’ be’, ma rayog ni ngki fas biyay, fa?” Aram e n’en ni fith be’ kakrom ni Job fithingan. (Job 14:14; King James Version) Sana kam lemnag e re thin nem. Ra uw rogon e tafinay rom ni faan ga ra nang ni rayog ni ngkum cheggad e piin nib t’uf rom ni kar m’ad u roy u fayleng u fithik’ e flaab?

I micheg e Bible ni gaar: “Ra fas e pi yam’. . . . yad ra fas ko yam’.” Miki gaar e Bible: “Piin ni yad mmat’aw e bay ra pired u daken e fayleng u fithik’ e gapas, me par ni taferad ni dariy n’umngin nap’an.”—Isaiah 26:19; Psalm 37:29.

Faanra ngari mich e pi thin ney u wan’dad, thingar da nanged e fulweg ko pi deer ni baaray: Mang fan ma yim’ e girdi’? Bay e piin ni kar m’ad u uw? Ma ra diin me mich u wan’dad ni ku yad ra fas biyay?

Yam’, Nge N’en Nra Buch U Nap’an Ni Gad Ra Yim’

I tamilangnag e Bible ni de m’agan’ Got ngay ni nge yim’ e girdi’ ko tobolngin. I sunmiy e gal nsomm’on e girdi’ ni Adam nge Efa, me tayrow nga lan e paradis u fayleng ni Eden fithingan, me motochiyelnagrow ni ngar diyengow nge garer e Paradis nge taw nga ga’ngin e fayleng. Yow ra yim’ ni faan dab ra folgow ko motochiyel rok.—Genesis 1:28; 2:15-17.

De tay Adam nge Efa fan e runguy rok Got, ma dar folgow rok, ere thingari yib e gechig ngorow nrogon ni ke yog. I yog Got ngak Adam ni gaar: “Ngam sul ko but’ ni ir e ni ngongliyem riy. Ni ngongliyem ko but’, ere bay kum ngal’ ni but’ bayay.” (Genesis 3:19) U m’on ni sum Adam ma da immoy nib fas u bayang; ya immoy ni but’. Ma nap’an ni de fol ara ke denen, me yog ngak Adam ni nge sul ko but’, ni aram e nge sul ni dabki par nib fas.

Ere yam’ e ban’en ni dariy e yafas riy. I weliy e Bible e thil ko yam’ nge yafas ni gaar: “Ya denen e ma pi’ puluwoy​—⁠ni yam’; machane tow’ath rok Got ngodad ni dariy puluwon e yafas ndariy numngin nap’an.” (Roma 6:23) I tamilangnag e Bible ni ri dariy ban’en ni manang e piin ni kar m’ad ni gaar: “Ya piin nib fas e yad manang ni yad ra yim’; machane piin ni kar m’ad e dakuriy ban’en ni ka yad manang.” (Ecclesiastes 9:5) I yog e Bible ni nap’an nra yim’ be’ ma: “Ra chuw gelngin me sul ko but’; ma rorran nem e ra m’ay e tafinay rok.”—Psalm 146:3, 4.

Ke mus ni goo Adam nge Efa e dar folgow ko fare motochiyel u Eden, ere mang fan ni gad gubin ma gad ma yim’? Gad ma yim ni bochan e ni gargelegdad u tomren ni daki fol Adam, ere ke af e denen nge yam’ rok ngodad. I weliy e Bible ni gaar: “Denen e yib nga fayleng u daken taabe’ ” [Adam], ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.”—Roma 5:12; Job 14:4.

Sana ra fith be’: ‘Gathi bay e yaal rok e girdi’ ni dabiyog ni nge yim’ ni ra i par nib fas u tomren ni ra yim’ be’?’ Boor e girdi’ ni ma machibnag e re thin nem, ma boch e girdi’ e ma yog ni yam’ e aram e kanawo’ ara mab nga yugu reb e tamilang. Machane re machib nem e de sum u Bible. Ya Thin Rok Got e ma yog ni gur e yaal, ma yaal rom e gur nge dowam nge lanin’um. (Genesis 2:7; Jeremiah 2:34; Proverbs 2:10) Miki gaar e Bible: “Fare yaal ni ma denen e ra yim’.” (Ezekiel 18:4) Dariy bang u Bible ni be yog ni bay e yaal rok e girdi’ ni dabiyog ni nge yim’ ni ra magay nib fas u tomren ni ke yim’ e dowef.

Rogon Nrayog Ni Ngki Fas E Girdi’ Biyay

Tomren ni yib e denen nge yam’ nga fayleng, me tamilangnag Got nib m’agan’ ngay ni ngki fas e piin ni kar m’ad biyay ara ngar fasgad ko yam’. I weliy e Bible ni gaar: “Me pagan’ Abraham ngay nrayog rok Got ni nge faseg Isak ko yam’.” (Hebrews 11:17-19) Mab puluw e n’en ni ke pagan’ Abraham ngay, ya i yog e Bible u morngaagen Got ni gaar: “Fan e re n’ey e ir e Got rok e girdi’ nib fos, ma gathi Got rok e girdi’ nib yam’​—⁠ya rogon ni be guy Got e girdi’ e yad urngin ni yad ba fas.”—Luke 20:37, 38.

Arrogon, gathi ke mus ni bay gelngin Got ni nge faseg e yam’ ya mm’agan’ ngay ni nge faseg e piin ni ba adag ni nge fasegrad. I yog Jesus Kristus ni gaar: “Dab mu gingad ko re bugithin ney; ya ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’.”—John 5:28, 29; Acts 24:15.

De n’uw nap’an u tomren ni yog Jesus e re thin nem me guy e girdi’ ni be un ko gum’eyag ni be yib ko binaw nu Nain u Israel. Fare pagal ni ke yim’ e fak be’ ni kari maagirag rok, ni be’ ni ppin ni ke yim’ e pumoon rok. Nap’an ni guy Jesus e kireban’ rok fare ppin, meri taganan’. Me ere non Jesus ngak fare yam’ ni gaar: “Fachi cha’! Be lungug ngom, mu suwon!” Me suwon fare pagal me fulweg Jesus facha’ ngak e chitiningin.—Luke 7:11-17.

Kari gel e falfalan’ rok fare ppin, maku ba gel e falfalan’ u tabinaw rok Jairus u nap’an ni yan Jesus nga tafen, ma Jairus e ir e ba tolang u tafen e muulung ko gin’em. Ya ka fini yim’ bochi ppin ni 12 e duw rok ni fak Jairus. Ma nap’an ni yan Jesus nga tafen Jairus me yan ko fare yam’ me gaar ngak: “Fachi ppin, mu suwon!” Me suwon!—Luke 8:40-56.

Boch nga tomren me yim’ Lazarus ni fager rok Jesus. Nap’an ni yib Jesus nga tafen ma ke yim’ Lazarus ni nga aningeg e rran. Yugu aram rogon ni rib gel e kireban’ rok Martha ni walagen Lazarus, i dag ni bay e athap rok ya ke gaar: “Gu manang ni bay ni faseg ko yam’ ko chirofen ni ir e tomur ko rran.” Me yan Jesus ko fare malangen e yam’ me yog ni ngan chuweg fare gafi malang u langan e yiy ko gini kan k’eyag Lazarus riy, me pong ni gaar: “Lazarus, moy nga wen!” Me yib Lazarus!—John 11:11-44.

Amu lemnag e re n’ey: Uw rarogon Lazarus ko fa aningeg i rran ni immoy ni ba yam’? De weliy Lazarus u mornaagen e flaab u tharmiy ara gafgow u infierno, ma ri ra weliy ni faan manga i yan e ngaram. Danga, ya ba yam’ Lazarus ni dariy ban’en ni ka manang, ma ra par ni aram rogon nge mada’ ko ngiyal’ ni “ngan faseg e yam’ riy ko chirofen ni tomur ko rran” ni faan manga de faseg Jesus Lazarus ko yam’.

Riyul’ ni angin e pi maangang ni fl’eg Jesus e ke mus ni bochi ngiyal’, ya piin ni kar fasgad ko yam’ e kur m’ad biyay. Machane i micheg ni nga 1,900 e duw faram ni ra fas e yam’ biyay u daken gelngin Got! Ere i micheg Jesus ko pi maangang ni i fl’eg ni ku aram e n’en ni ra rin’ u fayleng u tan e gagiyeg nra tay Gil’ilungun Got.

Nap’an Nra Yim’ Be’ Nib T’uf Rom

Nap’an nra yim be’ nib t’uf rom ma rib gel e kireban’ rom ni yugu aram rogon ni ga be athapeg ni go manga yigi fas ko yam’. Mmich u wan’ Abraham ni ra fas e ppin rok ko yam’, machane gad ra bieg ni “i yornag Abraham Sarah me dolo’loy!” (Genesis 23:2) Me Jesus? Nap’an ni yim’ Lazarus “me ri taganan’ ” Jesus, ma boch nga tomren “me yor Jesus.” (John 11:33, 35) Ere nap’an ni ra yim’ be’ rom, gathi be m’ug ni gab meewar ni faan ga ra yornag.

Nap’an nra yim’ e bitir ma rib gel e gafgow rok e chitiningin. I weliy e Bible ni rib gel e kireban’ nra tay e matin. (2 Kings 4:27) Ma kub gel e gafgow rok e matam. Nap’an ni yim’ Absalom ni fak David, i yog David ni gaar: “Faan mang e gu wan nga luwan nggum’ ma kab fel’!”—2 Samuel 18:33.

Machane bochan e mmich u wan’um ni ra fas e yam’ ma dabki par e kireban’ rom ni ke pag rogon. I yog e Bible ni “dabi kireban’um ni bod e piin ndariy ban’en ni ke l’agan’rad ngay.” (1 Thessalonika 4:13) Danga’, ya ga ra chugur ngak Got u fithik’ e meybil ma be micheg e Bible ni “ra ayuwegem Got.”—Psalm 55:22.

Thin ko Bible ni bay ko gi babyor ney e yib ko New World Translation of the Holy Scriptures.