Be Piningem Got Ni Ngam Mang Fager Rok

Baadag Got ni ngam fager ngak. Kaam lemnag nrayog ni ngam m’ag fager ko En th’abi ga’ u palpal thib? Abraham ni immoy kakrom e ka ni pining e fager ku Got ngak. (James 2:23) Ma boch e girdi’ u Bible e ku arrogon ni kar falfalan’gad ko fager rorad Got ma kan tow’athnagrad. Ma ngiyal’ ney, ma gubin yang u fayleng e bay e girdi’ riy ni kar manged tafager ku Got. Me gur e ku rayog ni ngam fagergow Got.

Yira fager ngak Got ma kab fel’ ko ngan fager ngak e girdi’. Got e ri dabi kireban’nag e piin ba yul’yul’ ni fager rok. (Psalm 18:25) Yira fager ngak Got ma kab fel’ ko bin nge yoor e salpiy rok be’. Nap’an nra yim’ be’ ni boor e ban’en rok me yan e salpiy rok be’. Yugu aram rogon ma piin yad ma falfalan’ ko fager rorad Got e bay e machaf rorad ndariy be’ nrayog ni fek.—Matthew 6:19.

Boch e girdi’ e ra guy rogon ni ngan talegnem ndab kum fil murung’agen Got. Mus ko pi fager nge chon e tabinaw rom ma yad ra rin’ e re n’ey. (Matthew 10:36, 37) Faanra un minmin ngom ara un gafgownigem, mu fithem, ‘Mini’ e gu baadag ni nggu falfalan’nag—girdi’ fa Got?’ Mu lemnag e re n’ey: Faanra gaar be’ ngom ngam tal ko abich ma ga ra fol rok? Ri danga’! Ya ba t’uf e ggan ko yafos rom. Machane Got e rayog ni nge tayem ni ngam par ni gab fas ni manemus! Ere ri dabmu pag be’ ni nge tagelnem ndab kum fil rogon ni ngam mang fager ku Got.—John 17:3.