Uw Rogon Nrayog Ni Ngam Fil Murung’Agen Got

Rayog ni ngam fil murung’agen Jehovah ko bieg e Bible. Kakrom e mel’eg Got boch e girdi’ ni ngar yoloyed rogon e lem rok. Ma pi n’en ni kan yoloy nem e kan nog e Bible ngay. Ma ngiyal’ ney e rayog ni da filed murung’agen Got ni gad ra bieg e Bible. Ya Bible e bay riy e thin rok Jehovah ni ke thagthagnag, ni kan nog e Thin Rok Got. Rayog ni nge mich u wan’dad e pi n’en ni ke yog e Bible yi Got e dabi lifith l’igin. “Ri dabi yog rok Got ni nge lifith l’igin.” (Hebrews 6:18) Thin Rok Got e yigoo ba muun ngay e tin riyul’.​—John 17:17.

Fare Bible e reb e tin th’abi fel’ e tow’ath rok Got ngodad. Taareb rogon nga bangi babyor ni yib rok ba matam ngak pi fak nri ba t’uf rok. Be weliy ngodad e tin ke micheg Got nra thiliyeg rarogon e re fayleng ney nge mang bangi ban’en nrib fel’ ni ngan par riy—ba paradis. Ki weliy ngodad e tin i rin’ kakrom nge tin be rin’ e chiney nge tin bay fini rin’ boch ngaram ni fan ko tin ba yul’yul’ i pi fak. Ir e ma ayuwegdad ni ngad pithiged e pi magawon rodad ma gad pirieg e falfalan’.​—2 Timothy 3:16, 17.

Pi Mich Rok Jehovah e fager rok Got; yad ra ayuwegem ngam nang fan e n’en ni be fil e Bible. Ke mus ni nga mog ngorad ni ga baadag ni ga ra fil e Bible. Ma dabra feked puluwon. (Matthew 10:8) Maku ba peth ngay nrayog ni ngam un ko pi muulung ko Kristiano. Pi n’ey e yima tay u bang ni tagil’ e liyor ara meybil ni kan nog e Kingdom Hall ngay. Faanra um un ko pi muulung ko Kristiano ney ma ra papey nge ilal e tamilangan’ rom ku Got.

Rayog ni ngam nang rarogon Got ko pi n’en ke sunmiy. Baaray rogon; ke yog e Bible: “Ke sunmiy Got e tharmiy nge but’.” (Genesis 1:1) Nap’an ni sunmiy Got e “pi tharmiy” me fl’eg e yal’. Ere mang e ma yog ngodad e chiney u murung’agen Got? Be yog ngodad ni Jehovah bay gelngin ni rib gel. Ke mus ni go’ ir e kura fl’eg ban’en nib gel gelngin ni bod e yal’. Ir e ku ma yog ngodad feni gonop Jehovah yi turuguy me gonopiy rogon ni nge fl’eg e yal’ nge pi’ ramaen nga wuru’ nge gawelngin ma dabi mo’ruf ban’en riy.

Pi n’en ni ke sunmiy Jehovah be dag feni gad ba t’uf rok. Amu lemnag urngin mit e wom’engin e gekiy nib thilthil ni bay u daken e fayleng. Rayog rok Jehovah ni nge pi’ ngodad taab mit ara dariy. Ma biney e danga’ ya ke pi’ ngodad boor mit e wom’engin, maku arrogon yaan nge ga’ngin nge raen nge lamen ni ku ba yoor mit. Re n’ey e be dag ni Jehovah reb e Got ni gathi ke mus ni ma runguyey ya ri ku ba gol ni ma lemnagey ma ku ba m’agan’ ngay ni ngi i pi’ ban’en.​—Psalm 104:24.